Qazaqstan armııasy «Ashyq aspan-2022» oqý-jattyǵýyn bastady

ASTANA. QazAqparat – Qazaqstanda «Aıbalta-2022» jedel-strategııalyq oqý-jattyǵýy sheńberinde «Ashyq aspan-2022» jedel-taktıkalyq komandalyq-shtabtyq oqý-jattyǵýy bastaldy. Bul týraly QR Qorǵanys mınıstrliginiń baspasóz qyzmetinen málim etti, dep habarlaıdy QazAqparat.

Oqý-jattyǵýǵa 40-tan astam maıdandyq, armııalyq jáne áskerı-kóliktik avıatsııa, pılotsyz ushý apparattary, sondaı-aq áýe shabýylyna qarsy qorǵanys áskerleriniń kúshteri men quraldary jumyldyrylǵan. Іs-qımyldarǵa Áýe qorǵanysy kúshteriniń bas qolbasshysy avıatsııa general-leıtenanty Nurlan Ormanbetov basshylyq etýde.

Málim etilgendeı, jattyǵýlar elimizdiń barlyq óńirinde ótedi. Maqsat – qarsylas áýe shabýyly quraldaryn qoldanǵan kezde jeke quramdy praktıkalyq is-qımyldarǵa úıretý.

«Qazirgi tańda áskerı-áýe kúshteri men áýe shabýylyna qarsy qorǵanys áskerleriniń basqarý organdary, quramalary men bólimderi jaýyngerlik ázirlikke keltirilip, oqý-jaýyngerlik qımyldardy uıymdastyrý sharalaryn júrgizýde.

Kelesi kezeńderde avıatsııanyń praktıkalyq ushýlarymen quramalar men bólimderdi jaýyngerlik mindetterdi oryndaýǵa daıyndaý uıymdastyrylatyn bolady. Sondaı-aq Áýe qorǵanysy kúshterin basqarýdyń avtomattandyrylǵan júıesin paıdalana otyryp, shartty áýe nysandaryn ustap, olardy joıý júzege asyrylady», - delingen mınıstrlik habarlamasynda.

Budan ózge, qazaqstandyq áskerıler UQShU-nyń ujymdyq jedel den qoıý kúshteriniń «Іzdestirý-2022», «Eshelon-2022» jáne «Ózara is-qımyl-2022» oqý-jattyǵýlaryna tartylatyn bolady. Oqý-jattyǵýlar 7 qazanǵa deıin jalǵasady.

Foto : gov.kz