Qazaqstan armııasy árqashanda kúshti, kásibı deńgeıi joǵary bolýy kerek - respýblıkalyq basylymdarǵa sholý

Keshe Elbasy - Qazaqstan Qarýly Kúshteriniń Joǵarǵy Bas qolbasshysy Nursultan Nazarbaevtyń tóraǵalyq etýimen Qorǵanys mınıstrliginiń ótken jylǵy qyzmetiniń qorytyndysy men aldaǵy ýaqytqa josparlanǵan mindetterdi talqylaýǵa arnalǵan keńeıtilgen alqa májilisi ótti. Osyǵan elimizdiń bas gazeti «Egemen Qazaqstanda» «Jaýyngerlik daıyndyq joǵary» degen taqyryppen kólemdi maqala jaryq kórdi. Basylymnyń jazýynsha, Memleket basshysynyń aldynda esep bergen elimizdiń Qorǵanys mınıstrligi ózi basshylyq jasaıtyn vedomstvonyń 2009 jyly atqarǵan sharalaryna keńinen toqtalyp, aldaǵy jyly atqarar isterine oraı egjeı-tegjeıli málimetter bergen. Maqalada QR Prezıdentiniń «Qazir bizdiń Qarýly Kúshterimizdi damytýǵa áleýetimiz jetedi. Osy baǵytta jumystar da istelinip jatyr. Bul jumystardyń ári qaraı nátıjeli bolýyna Úkimet qoldaý kórsetýi kerek. Osyǵan baılanysty mınıstrlik kásipkerlermen Qarýly Kúshterge qajet qural-jabdyqtardy óndirý úshin málimetterdi keńinen bólisýi tıis. Qazaqstan armııasy árqashanda kúshti, kásibı deńgeıi joǵary bolýy kerek», degen sózi keltirilgen.

Qorǵanys mınıstrliginiń alqa májilisine keńinen toqtalǵan «Aıqyn» gazeti juma kúngi nómirinde «Qarýly Kúshter el táýelsizdigi úshin jan aıamaı qyzmet etedi» degen taqyryppen basylǵan. Qazaq eli ulttyq áskerı basqarý qurylymyn qalyptastyrýdy aıaqtady. Keshe Qorǵanys mınıstrligi osyny pash etken saltanatty rásim uıymdastyrdy. El Prezıdenti, Qazaqstannyń Qarýly Kúshteriniń Joǵarǵy Bas qolbasshysy Nursultan Nazarbaev elimizdiń Qurlyq áskerlerine jáne Áskerı-teńiz kúshterine jaýyngerlik tý tapsyrdy. Osy rásimnen keıin Elbasy "Soldattar men ofıtserler, elimizdiń azamattary endi barlyq quraldarmen, bar kúsh-jigerimen, tipti ózderiniń ómirlerin de aıamaı, Otandy qorǵaıtyn bolady! Men bizdiń atamekenimiz - Qazaqstandy qorǵap qalý úshin osy týdyń astynda urys salý óneri jetildiriledi, áskerı tártip kúsheıtiledi dep senemin" degen oıyn jetkizgen.

Al osy taqyrypqa toqtalǵan «Alash aınasy» gazeti búgingi nómirinde «Bas qolbasshy qos sardarǵa tý tapsyrdy» degen maqala basty. Jarııalanymda Memleket basshysynyń jaýyngerlik tý tapsyrǵany baıandala kele, «Qorǵanys mınıstrligindegi saltanatty shara osydan keıin Memleket basshysynyń tóraǵalyǵymen keńeıtilgen alqa májilisine ulasty. Alaıda keńeıtilgen alqa otrysy jabyq esik jaǵdaıynda ótkizildi», delingen.

Memleket basshysynyń tóraǵalyǵymen ótken osy alqaly jıyn arqaý bolǵan maqalalardy «Kazahstanskaıa pravda», «Ekspress K», «Lıter» basylymdarynan da oqı alasyzdar.

«Egemen Qazaqstan» gazetiniń jazýynsha, Memleket basshysy Nursultan Nazarbaev QR Bas prokýrory Qaırat Mámıdi jáne Respýblıkalyq bıýdjettiń atqarylýyn baqylaý jónindegi esep komıtetiniń tóraǵasy Omarhan Óksikbaevty qabyldaǵan. Bas prokýror Prezıdentti elimizdegi zańdylyqtyń jaǵdaıy men quqyq tártibi týraly habardar etse, O. Óksikbaev Prezıdentke komıtet júrgizgen 2009 jylǵy baqylaý sharalarynyń qorytyndylary týraly baıandaǵan.

«Bitimgershiliktiń qıyn da qarapaıym jolyna qadam jasaldy». Osy taqyryppen berilgen «Egemen Qazaqstan» gazetiniń maqalasynda EQYU-nyń Іs basyndaǵy tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev óziniń Ońtústik Kavkaz elderine saparyn aqpannyń 17-inde Grýzııa astanasy - Tbılısıde qorytyndylaǵandyǵy baıandalǵan. «Sapar barysynda EQYU-nyń Іs basyndaǵy tóraǵasy Grýzııanyń Syrtqy ister mınıstri Grıgol Vashadzemen kelissóz júrgizip, Grýzııa Parlamentiniń tóraǵasy Davıd Bakradzemen jáne osy eldegi saıası partııalardyń jetekshilerimen kezdesti», dep jazady basylym.

«Qazaqstan Grýzııa porttarynyń birinde astyq termınalyn salady», dep jazady «Lıter» gazeti. Bul jaıynda taıaý kúnderi EQYU-nyń Іs basyndaǵy tóraǵasy Qanat Saýdabaev málim etken. Ol osy arqyly ózi basqaratyn uıymnyń, sondaı-aq Qazaqstannyń zakavkaz respýblıkasyndaǵy jaǵdaıdy retteýge qatysty ustanymyn bildirgen. EQYU-nyń Іsbasyndaǵy tóraǵasy Qanat Saýdabaevtyń Tbılısıdegi sapary «Merrıot» besjuldyzdy qonaq úıi zaldarynyń birinde oppozıtsııalyq partııalardyń kóbasshylarymen kezdesýden bastaldy, dep tolyqtyra túsken basylym.

***

«Aıqyn» gazetiniń dástúrli «Aq sóıle!» aıdarynyń qonaǵy - QR Parlamenti Májilisiniń depýtaty Shalataı Myrzahmetov. Suhbat basylymnyń búgingi nómirinde «Qazaqtan ótken mádenıetti de ulaǵatty halyq joq» degen taqyryppen jarııalanǵan. San túrli salany qamtyǵan suhbat barysynda Májilis depýtaty «Elbasymyzdyń «jastar úsh tildi bilýi kerek» degen ustanymyn men de qoldaımyn. Biraq eń basynda memlekettik til bolýy kerek. Odan keıin neshe tildi bilseń de, kóptik etpeıdi» degen pikirin bldirgen. Ekeýara áńgimege arqaý bolǵan jaıttarmen tanysqyńyz kelse, basylymnyń juma kúngi nómirine nazar salyńyz.

«Eýropadaǵy qaýipsizdik pen yntymaqtastyq uıymy sammıtin ótkizý osy uıymdaǵy daǵdarysty jaǵdaıdy eńserýge jaǵdaı jasaıdy. Bul týraly Qazaqstan Parlamenti Senatynyń Tóraǵasy Qasym-Jomart Toqaev keshe Venada EQYU Parlamenttik assambleıasy Turaqty komıtetiniń otyrysynda málimdedi» dep jazady «Aıqyn» gazeti «Sammıt arqyly daǵdarys eńserilmek» atty maqalasynda. Jarııalanymda atalǵan otyrys jaıynda keńinen baıandalǵan.

Osy taqyryp arqaý bolǵan maqalalardy «Egemen Qazaqstan», «Kazahstanskaıa pravda», «Ekspress K», «Lıter» basylymdarynyń búgingi nómirinen de oqı alasyzdar.

***

«Alash aınasy» gazetiniń juma kúngi sanynyń Dat aıdarynda geologııa-mıneralogııa ǵylymdarynyń doktory, professor, QR UǴA akademıgi Júrimbek Sadyqovpen aradaǵy suhbat «Ǵylymsyz eldiń ekonomıkasy damymaıdy» degen taqyryppen berilgen. Ekeýara áńgime barysynda ǵalym «qazirgi jastardyń psıhologııasy ózgerdi me, ǵylymǵa degen qyzyǵýshylyq joqtyń qasy. Men zerttep júrgen gıdrogeologııaǵa kelip jatqan jastar tipti neken-saıaq. Onyń bir sebebin men ǵylymǵa qarjy bólinbeýinen dep túsinemin. Bizdiń kezimizde memleket ǵylymdy erekshe qamqorlyǵyna alyp, ǵylymı qyzmetkerlerdiń aılyq jalaqylaryn óte joǵary tóledi. Al qazir jaǵdaı basqa», depti.

Osy basylymdaǵy taǵy bir eleýli maqala «Handardan qalǵan urpaqty ulyqtaı alyp júrmiz be?» degen taqyryppen jaryqqa shyqty. Túrtki aıdarymen berilgen bul maqalada basylym «Tarıhty tiriltip jatyrmyz deıtin ǵalymdarymyz nege qazaq handarynyń urpaqtaryn zertteýdi tereńdete túspeıdi? Tegimizdi túgendeýden utpasaq, utylmaımyz» degen oı ushyǵyn shyǵarady.

Sonymen qatar «Alash aınasy» gazetiniń sport taqyrybyna arnalǵan «Doda» betinde qazirgi ýaqytta tórtkúl dúnıeniń nazaryn ózine aýdartqan Vankýverdegi qysqy Olımpıadada arnaıy issaparmen júrgen tilshi Nurǵazy Sasaevtyń baıraqty básekede baq synaýshy qandastarymyzdyń aıaq alysy týraly arnaıy reportajymen de tanys bola alasyzdar.