Qazaqstan armııasynyń áskerı qyzmetshisi Qytaıdaǵy Azııa chempıonatynda altyn aldy
ASTANA. KAZINFORM – Qazaqstan Respýblıkasy Qarýly kúshteriniń áskerı qyzmetshisi serjant Elaman Qýatov eresekter arasynda 120 kelige deıingi salmaq dárejesinde áýesqoı aralas jekpe-jekten (AMMA) Azııa chempıony boldy. Búl týraly Qorǵanys mınıstrligi habarlady.
5-12 qańtar aralyǵynda Qytaı Halyq Respýblıkasynyń Lýdjoý qalasynda ótken áýesqoı aralas jekpe-jek boıynsha Azııa chempıonatyna qurlyqtyń úzdik sportshylary qatysty.
Serjant Elaman Qýatov týrnır barysynda joǵary sporttyq deńgeıin tanytyp, chempıon atandy.
Qazaqstandyq áskerı qyzmetshi chempıonatta úsh kezdesý ótkizdi. Birinshi aınalymda ol Taıpeı ókilin jeńse, ekinshi kezdesýinde Qytaı sportshysyn qapy qaldyrdy. Fınalda Ózbekstannan kelgen qarsylasyn aıqyn basymdyqpen jeńdi.
Aıta keterligi, bul – Qazaqstan Qarýly kúshteri tarıhynda áýesqoı aralas jekpe-jek boıynsha Azııa chempıonatynan alǵan alǵashqy altyn medal. Elaman Qýatovtyń jeńisi otandyq áskerı sporttyń damýyna jańa serpin berdi.
Budan buryn Túrkııadaǵy dástúrli týrnırde palýandarymyz grek-rım kúresinen 2 altyn alǵan bolatyn.