Qazaqstan armııasynda jańa talap: ár sarbaz keminde 5 kitap oqýy tıis
ASTANA. KAZINFORM – Qazaqstan Qarýly Kúshterinde merzimdi qyzmet kezeńinde árbir áskerı qyzmetshi keminde bes kitap oqýy tıis degen jańa talap engizildi.
Bul bastama 23 sáýirde atap ótiletin Kitap kúni qarsańynda oqý mádenıetin qalyptastyrýǵa jáne jeke quramnyń zııatkerlik damýyna baǵyttalǵan. Aıta keteıik, bul kún ıÝNESKO bastamasymen álemde Dúnıejúzilik kitap jáne avtorlyq quqyq kúni retinde atalyp ótedi, al Qazaqstanda alǵash ret 2025 jyly resmı túrde belgilendi.
Qarýly Kúshterde oqý mádenıetin damytý júıeli túrde júrgizilýde. Búginde áskerı bólimder men mekemelerde 322 kitaphana jumys isteıdi. Olardyń qorynda 52 434 dana kórkem ádebıet pen 198 293 oqý basylymy bar. Jyl basynan beri áskerı qyzmetshilerge 48 837 kitap berilgen.
– Bizdiń kitaphanamyzda otandyq avtorlardyń, áskerı jazýshylar men ǵalymdardyń eńbekteri mol. Olar áskerdiń qalyptasýy men damýyn qamtıtyn qundy dúnıeler. Kitaphana 2020 jyly ashyldy, qorynda 7000-nan astam kitap bar. Kitaptar negizinen qaıyrymdylyq aktsııalary arqyly jınaldy, sondaı-aq Astana men Almaty kitaphanalary jáne Ulttyq qorǵanys ýnıversıteti úlken qoldaý kórsetti. Sırek basylymdar da jetkilikti, – dedi Ulttyq áskerı-patrıottyq ortalyǵy áskerı-ǵylymı kitaphanasynyń meńgerýshisi Oksana Áljanova.
Mınıstrlik málimetinshe, kitaphana qoryn tolyqtyrý demeýshiler, baspalar jáne qaıyrymdylyq aktsııalary arqyly júzege asady. Áskerı qyzmetshiler de jeke kitaptaryn tapsyryp, bul iske belsendi qatysýda.
Jańa talap tárbıe jáne bilim berý jumysynyń bir bóligi retinde engizilgen. Kitap oqý synı oılaýdy damytyp, dúnıetanymdy keńeıtýge yqpal etedi.
– Qyzmet barysynda kitap oqýǵa barlyq múmkindik bar. Qazir Muhtar Shahanovtyń eńbegin oqyp júrmin. Ásirese detektıv janry men áskerı taqyryptaǵy kitaptar qyzyqtyrady, – dedi shyǵarmashylyq vzvodtyń sarbazy Nurdos Aıtmuhametov.
Aıta keteıik, Qazaqstanda 12 myńǵa jýyq kitaphana jumys isteıdi.
