Qazaqstan Armenııaǵa Ortalyq Azııamen baılanysty nyǵaıtýǵa múmkindik bere alady – sarapshy

ASTANA. KAZINFORM – 27 naýryzda Armenııanyń Syrtqy ister mınıstri Ararat Mırzoıannyń Qazaqstanǵa alǵashqy resmı sapary ótti, dep habarlaıdy Kazinform agenttiginiń menshikti tilshisi.

Қазақстан Арменияға Орталық Азиямен байланысты нығайтуға мүмкіндік бере алады – сарапшы
Фото: APRI Armenia

Memleket basshysy Qasym-Jomart Toqaev Armenııanyń Syrtqy ister mınıstrin qabyldaý barysynda eki el prezıdentteriniń byltyr Qazaqstan men Armenııaǵa jasaǵan saparlary ózara qarym-qatynasty jan-jaqty damytýǵa serpin bergenin atap ótti. 

A. Mırzoıannyń Qazaqstanǵa saparyndaǵy kelissózder barysynda ekijaqty yntymaqtastyqtyń saýda-ekonomıkalyq bóligi jáne óńirlik tranzıttik áleýetti damytý máseleleri qozǵaldy.  

APRI Armenııa qoldanbaly saıası zertteýler ınstıtýtynyń ǵylymı qyzmetkeri Sergeı Melkonıannyń aıtýynsha, Qazaqstan men Armenııa arasyndaǵy ekijaqty qarym-qatynasty damytýdyń kún tártibi aıtarlyqtaı keń, ıaǵnı tikeleı áýe qatynasy men taýar aınalymyn yntalandyrýdan bastap eki eldiń tranzıttik áleýetin arttyrýǵa deıin.

— Meniń oıymsha, qabyldanǵan saýda-ekonomıkalyq qatynastardy damytýdyń 2024-2025 jyldarǵa arnalǵan jol kartasy qarqyndy ózgerister jaǵdaıynda qazirdiń ózinde tolyqtyrýlardy qajet etedi. Belgilengen baǵyttar boıynsha kún tártibi sapaly túrde tolyqtyrylǵannan keıin, strategııalyq áriptestik týraly aıtýǵa bolady. Qarym-qatynastyń dál osy deńgeıi damýdyń baǵdary bolýy tıis. Al Armenııanyń múddesine toqtalsaq, Qazaqstan Armenııaǵa Ortalyq Azııa óńirimen baılanystardy nyǵaıtýǵa múmkindik bere alady. Erevan úshin Astana aımaqtaǵy negizgi seriktes sanalady. Joǵary deńgeıdegi tyǵyz úılestirýsiz bul yntymaqtastyqtyń tolyq áleýetin júzege asyrýǵa kedergi keltiretin logıstıkalyq qıyndyqtardy joıý múmkin emes, - dedi sarapshy.

Bul turǵyda Sergeı Melkonıan eki el de kólik-logıstıkalyq dálizderdi damytýda birlesip jumys isteı alatynyna senimdi. Bul óz kezeginde tranzıttik áleýetti arttyryp, óńirlik ekonomıkalyq ıntegratsııanyń tyǵyz baılanysyn qamtamasyz etedi.

— Bul yntymaqtastyq Armenııa ekonomıkasyn ártaraptandyrýǵa jáne azyq-túlik qaýipsizdigin jaqsartýǵa yqpal etedi. Osy oraıda ulttyq qaýipsizdik pen turaqtylyqtyń mańyzdy aspektisi sanalady. Búginde qos eldiń arasynda qarym-qatynasty eki baǵy boıynsha órbitýge bolady: «Qazaqstan-Reseı-Grýzııa-Armenııa» (teńiz jáne qurlyq boıynsha) jáne «Qazaqstan-Iran-Armenııa» (teńizben). Qazirgi marshrýttarǵa qosymsha «Qazaqstan-Túrikmenstan-Iran-Armenııa» baǵyty qosyldy. Jeńildetilgen rásimderdi qamtamasyz etý ekijaqty saýda-ekonomıkalyq qarym-qatynastardy damytýǵa, sonymen qatar bizdiń elderimizdiń aýqymdy naryqtarǵa shyǵýyna yqpal etedi. Qurlyq jáne teńizdegi baǵdarlar boıynsha qarym-qatynas áýe jolynan oqshaý damymaýy tıis. Tikeleı áýe qatynasyn ashý máselesi ekijaqty kún tártibinde basym oryn alýy tıis ekenin atap ótken jón. Ol kólik-logıstıkalyq baǵyttardy damytýdyń qozǵaltqyshy bolatyn týrızm men bıznestiń damýyn yntalandyrady, - dedi sarapshy. 

Buǵan deıin Qazaqstan men Armenııa baılanysy qaı baǵytta damyp kele jatqanyn jazǵan edik.

Сейчас читают