Qazaqstan Armenııaǵa Astanada elshilik salý úshin jerdi jylyna 1 teńgege jalǵa beredi
ASTANA. KAZINFORM — Armenııa men Qazaqstan elderinde Astana men Erevan qalalarynda jańa elshilik ǵımarattaryn salý týraly ózara kelisimge keldi. Bul týraly newsarmenia jazdy.
Armenııanyń Ulttyq jınalysy juma kúni Qazaqstanmen dıplomatııalyq ókildikter ǵımarattaryn salý úshin jer telimderin ózara berý jónindegi kelisimdi ratıfıkatsııalady.
Armenııa syrtqy ister mınıstriniń orynbasary Mnatsakan Safarıannyń aıtýynsha, kelisimge sáıkes Armenııa Qazaqstanǵa Erevan qalasyndaǵy Admıral Isakov dańǵyly boıynan 0,33 gektar jer ýchaskesin 49 jyl merzimge jalǵa beredi. Bul aýmaqta Qazaqstannyń elshilik ǵımarattary salynady. Jalǵa alý aqysy jylyna 1 drama ǵana bolady.
Al Qazaqstan óz kezeginde Astana qalasyndaǵy Arǵanaty kóshesinen 0,33 gektar jerdi dál osyndaı 49 jyl merzimge Armenııaǵa beredi. Bul jerde Armenııa elshiliginiń ǵımarattary salynady, al jaldaý aqysy jylyna 1 teńgeni quraıdy.
Kelisim shartyna sáıkes, jerdi jalǵa alýshy tarap ony úshinshi tulǵalarǵa satýǵa, berýge, jalǵa nemese qosalqy jalǵa berýge, sondaı-aq aýmaqty keńeıtýge quqyly emes. Kez kelgen ózgeris tek qabyldaýshy memlekettiń jazbasha kelisimimen ǵana júzege asady.
Vıtse-mınıstrdiń aıtýynsha, bul kelisim eki el arasyndaǵy saıası dıalogty tereńdetýge, ekonomıkalyq jáne iskerlik baılanystardy damytýǵa jáne dıplomatııalyq mıssııalardyń jumys tıimdiligin arttyrýǵa yqpal etedi.
Aıta keteıik, Armenııa Qazaqstannyń sý resýrstaryn tıimdi basqarý baǵytyndaǵy bastamalaryn qoldaıdy.
