Qazaqstan-Armenııa úkimetaralyq komıssııasynyń 10-otyrysy ótedi

ASTANA. KAZINFORM – Ekonomıkalyq yntymaqtastyq jónindegi Qazaqstan-Armenııa úkimetaralyq komıssııasynyń 10-otyrysy ótedi. Bul týraly Syrtqy ister mınıstrliginiń resmı ókili Aıbek Smadııarov aıtty.

«2024 jylǵy 2 sáýirde beınekonferentsbaılanys formatynda Ekonomıkalyq yntymaqtastyq jónindegi Qazaqstan-Armenııa úkimetaralyq komıssııasynyń 10-otyrysyn ótkizý josparlanǵan. Іs-shara Qazaqstan Respýblıkasy Premer-Mınıstriniń orynbasary Serik Jumanǵarın men Armenııa Respýblıkasynyń Vıtse-premer-mınıstri Mger Grıgorıannyń tóraǵalyǵymen ótedi», - dedi Aıbek Smadııarov.

Onyń atap ótýinshe, taraptar saýda-ekonomıkalyq, ónerkásip, geologııa jáne jer qoınaýyn paıdalaný, aqparattyq-kommýnıkatsııalyq jáne joǵary tehnologııalar, ǵarysh qyzmeti, kólik jáne energetıka, aýyl sharýashylyǵy salalaryndaǵy yntymaqtastyq máselelerin qaraıdy. Sonymen qatar mádenı-gýmanıtarlyq, qorshaǵan ortany qorǵaý men óńiraralyq yntymaqtastyqtaǵy, densaýlyq saqtaý salalaryndaǵy ózara is-qımyldy jáne sharttyq-quqyqtyq bazany keńeıtý múmkindikterin talqylaıdy.

«Otyrys qorytyndysy boıynsha tıisti hattama qabyldaý josparlanǵan», - dedi resmı ókil.