Qazaqstan-Armenııa qarym-qatynasyn strategııalyq deńgeıge kóteretin qujatqa qol qoıylady — Toqaev
ASTANA. KAZINFORM — Armenııa Qazaqstannyń Ońtústik Kavkazdaǵy basty saıası jáne saýda-ekonomıkalyq seriktesiniń biri. Bul týraly Aqordada elimizge resmı saparmen kelgen Armenııa Premer-mınıstri Nıkol Pashınıanmen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
— Bul bas qosýdyń eki el úshin de mán-mańyzy zor. Biz dostyǵy berik, syılastyǵy jarasqan halyqtarmyz. Armenııa Qazaqstannyń Ońtústik Kavkazdaǵy basty saıası jáne saýda-ekonomıkalyq seriktesiniń biri. Qazaq jurty armıan halqyn erekshe qadirleıdi. Onyń tereń tarıhyna, baı mádenıeti men salt-dástúrine qurmetpen qaraıdy. Qazir Armenııa Qazaqstan azamattary kóp baratyn týrıstik eldiń birine aınaldy. Bıyl qos halyqty jaqyndastyra túsken aıtýly oqıǵalar boldy. Armenııada alǵash ret Qazaqstannyń mádenıet kúnderi ótti. Erevanda uly aqyn jáne aǵartýshy Abaı Qunanbaıulynyń qurmetine saıabaq ashyldy, — dedi Prezıdent.
Osy oraıda Memleket basshysy atalǵan mańyzdy bastamalarǵa qoldaý kórsetkeni úshin Nıkol Pashınıanǵa zor alǵysyn bildirdi.
— Muny qazaq eline degen erekshe iltıpatyńyz dep baǵalaımyz. Bul bastamalar Qazaqstan men Armenııa arasyndaǵy myzǵymas dostyq pen ózara qurmettiń aıqyn kórinisi. Eki el arasynda barlyq deńgeıde ashyq ári senimge negizdelgen saıası dıalog qalyptasqan. Aımaqtyq jáne halyqaralyq qurylymdar aıasynda tyǵyz ári tıimdi baılanys ornady. Saýda-ekonomıkalyq, mádenı-gýmanıtarlyq jáne ǵylym-bilim salasyndaǵy yqpaldastyǵymyz turaqty túrde damyp kele jatyr. Bir sózben aıtqanda memleketaralyq baılanysymyzdyń sıpaty erekshe. Aldaǵy ýaqytta da qarym-qatynasymyzdy damytýǵa zor múmkindik bar. Búgin biz eki el arasyndaǵy qarym-qatynastardy strategııalyq deńgeıge kóterý týraly tarıhı qujatqa qol qoıamyz, — dedi Qasym-Jomart Toqaev.
Esterińizge sala ketsek, Armenııa Respýblıkasynyń Premer-mınıstri Nıkol Pashınıan resmı saparmen Astana qalasyna keshe keldi.
Osydan biraz ýaqyt buryn Memleket basshysy Qasym-Jomart Toqaev elimizge resmı saparmen kelgen Armenııa Premer-mınıstri Nıkol Pashınıanmen kelissóz júrgizdi.