Qazaqstan arqyly ótetin tranzıttik jolaýshylar sany artyp keledi

ASTANA. QazAqparat - Qazaqstan arqyly ótetin tranzıttik jolaýshylar sany artyp keledi. Bul týraly búgin Úkimettiń selektorlyq rejimdegi otyrysynda atalǵan baǵdarlamanyń iske asyrylýy jóninde baıandaǵan QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.

«Azamattyq avıatsııa salasynda bıyl kórsetkishter ósiminiń oń qarqyny saqtalýda. Qańtar-qazan aılarynda áýe kóligimen 6,7 mıllıon jolaýshy tasymaldandy. Bul ótken jyldyń sáıkes kezeńimen salystyrǵanda 9,6 paıyzǵa kóp. 10 aıda elimizdiń áýejaılary 12,7 mln adamǵa qyzmet kórsetti. Bul 2017 jylǵy sáıkes kezeńmen salystyrǵanda 6 paıyzǵa joǵary», - dedi mınıstr.

Onyń dereginshe, 2018 jylǵy qańtar-qazan kezeńindegi tranzıttik ushaq-shaqyrymy 2017 jylǵy sáıkes kezeńmen salystyrǵanda 4 paıyzǵa óskeni baıqalady. Bıyl qańtar-qazan aılarynda tranzıttik avıajolaýshylar sany 764 442 adamǵa jetti. Bul ótken jylǵy sáıkes kezeńmen salystyrǵanda 47 paıyzǵa artyq.

«Jyl basynan beri qazaqstandyq jáne sheteldik áýe tasymaldaýshylardyń qatysýymen 13 jańa baǵyt ashyldy. Olar: Helsınkiden - Astanaǵa, Astanadan - Vılnıýske, Qazanǵa, Sochıge, Chelıabınskke, Krasnodarǵa, Tıýmenge, Tomskige. Rıga men Krasnoıardan - Almatyǵa, Atyraýdan - Frankfýrtqa, Máskeýden - Qyzylordaǵa jáne Novosibirden - Pavlodarǵa», - dedi mınıstr.

Sonymen qatar, ol qazirgi ýaqytta Semeı qalasy áýejaıynyń ushý-qoný jáne jermen júrý jolaǵyn, aerovokzalyn rekonstrýktsııalaý jobasyn iske asyrý jumystary jalǵasyp jatqanyn aıtty.

«Jumysty bıyl jyl sońyna deıin aıaqtaý josparlanyp otyr. Sonymen birge, bıyl Qostanaı qalasy áýejaıynyń ushý-qoný jolaǵyn qaıta jańǵyrtý bastaldy. 2019 jyly aıaqtalady»,-  dedi Jeńis Qasymbek.