Qazaqstan arqyly konteınermen júk tasymaldaý qansha turady

NUR-SULTAN. QazAqparat – Elimizde konteınermen júk tasymaldaý tranzıtiniń quny qansha? Bul suraqqa «KTZ Express» AQ konteınerlik tasymaldaý qyzmeti departamentiniń dırektory Erjan Baıǵojın jaýap berdi, dep habarlaıdy QazAqparat tilshisi.

«Konteınermen júk tasymaldaýdyń aýqymdy kólemi Eýropa elderinen keledi. Osydan 5 jyl buryn Eýropadan az kólemde júk tasymaldansa, qazir elimizge jetkiziletin júk kólemi aıtarlyqtaı artty, ásirese daıyn ónimder. Negizinen alǵanda bizdiń el arqyly Qytaıǵa avtomobıl jetkiziledi», - dedi Erjan Baıǵojın.

Sondaı-aq, departament basshysy Qazaqstan arqyly Eýropadan Qytaıǵa júk tasymalynyń qansha turatynyn aıtty.

«Qazir pandemııaǵa baılanysty baǵa ósti. Buryn bir júk konteıneriniń quny ortasha 6-7 myń AQSh dollaryn qurasa, qazir baǵa 9 myń AQSh dollaryna deıin kóterildi. Onyń ústine teńiz tasymaly da pandemııaǵa baılanysty baǵany ósirdi», - deıdi ol.

Sondaı-aq, E. Baıǵojın pandemııanyń elimizdiń júk tasymaly salasyna tıgizgen áseri týraly aıtyp berdi.

Odan bólek, spıker Qazaqstanda konteınermen júk tasymaldaý kóleminiń artqanyn alǵa tartty.