Qazaqstan arqyly konteınerlik tasymal kólemi 12 paıyzǵa ulǵaıdy

NUR-SULTAN. QazAqparat - Elimizde kólik salasy boıynsha naqty kólem ındeksi 2020 jyldyń qańtar-sáýirinde 89 paıyzdy qurady, dep habarlaıdy QazAqparat tilshisi.

QR Indýstrııa jáne ınfraqurylymdyq damý mınıstrliginiń Telegram paraqshasynda jarııalanǵan aqparatqa sáıkes, koronavırýs indetine baılanysty Qazaqstan aýmaǵynda jolaýshylardy avtobýspen tasymaldaý, onyń ishinde qalalyq jolaýshylardy avtobýspen tasymaldaý, jolaýshylar poezdary, turaqty áýe qatynastary toqtatyldy. Keıbir kásiporyndardy karantınge jabý kólik pen logıstıkaǵa áser etip, jetkizý kólemin jáne tasymaldaýǵa tapsyrystardy tómendetedi.

«Degenmen, bul kezeńde Qazaqstan arqyly konteınerlik tasymaldardyń jalpy kólemi ótken jyldyń sáıkes kezeńimen salystyrǵanda 12 paıyzǵa ulǵaıyp, 211,6 myń jıyrma fýnttyq konteınerdi qurady. Onyń ishinde Qytaı – Eýropalyq Odaq – Qytaı baǵyty boıynsha konteınerler tasymaly 25 paıyzǵa artqan», - delingen mınıstrlik aqparatynda.