Qazaqstan arqyly júk tasymalynyń jalpy kólemi 7,1% ósti

ASTANA. KAZINFORM – Qazaqstan óziniń tranzıttik áleýetin budan da arttyrý úshin aýqymdy jospar quryp otyr. Bul týraly Kólik saıasaty departamentiniń dırektory Dinmuhamed Sembaev aıtty. 

— Búginde Qazaqstanda keń aýqymdy kólik qatynasy júıesi qalyptasqan jáne ol álemdik naryqtarǵa shyǵatyn barlyq negizgi halyqaralyq kólik dálizderimen baılanysqan. Qazirgi tańda 5 halyqaralyq temirjol jáne 8 avtomobıl kólik dálizi jumys istep tur, — dedi ol Qazaqstannyń eksporttaýshylar forýmynda.

Sondaı-aq spıker aldaǵy 5 jylda júk tasymaly kólemin qazirgi kórsetkishten 3 esedeı arttyrý josparlanyp otyrǵanyn atap ótti.

— Ótken jyly Qazaqstan arqyly júk tasymalynyń jalpy kólemi 7,1%-ǵa artyp, 34,6 mıllıon tonnany qurady (onyń ishinde temirjol arqyly — 27,5 mln tonna, avtokólikpen — 6,7 mln tonna). 2030 jylǵa qaraı bul kólemdi 100 mıllıon tonnaǵa deıin jetkizý josparlanyp otyr. Bul kórsetkish Qazaqstannyń jańa baǵyttardy qalyptastyrýdaǵy mańyzdy rólin jáne osy salada tıimdi servıs qurý jolyndaǵy ambıtsııasyn aıqyn kórsetedi, — dedi Dinmuhamed Sembaev.

Aıta ketsek, Qazaqstan kólik-logıstıkalyq ınfraqurylymdy damytýǵa sońǵy 15 jylda 35 mlrd dollar ınvestıtsııalady.

Al 2027 jyly Transkaspıı kólik baǵytynyń júk ótkizý kólemi 10 mln tonnaǵa jetedi.