Qazaqstan arqyly júk tasymaly kólemi artty — Reseı temir joldary
ASTANA. KAZINFORM — «Reseı temir joldary» AAQ basshysy Oleg Belozerov Qazaqstan men Reseı arasyndaǵy temirjol tasymaly jáne lokomotıvterdi paıdalaný salasyndaǵy yntymaqtastyq máseleleri jóninde pikir bildirdi.
Onyń aıtýynsha, Qazaqstan aýmaǵy arqyly ótetin ekijaqty júk tasymaly shamamen 6%-ǵa artqan. Sonymen birge, júk aǵyny tek Qytaı baǵytyna ǵana emes, Ortalyq Azııa elderine de baǵyttalyp otyr.
Spıker taraptardyń túıisý beketterindegi tasymaldy damytý jáne qujat rásimdeýdi jedeldetý maqsatynda jyl saıyn mańyzdy kelisimderge qol qoıatynyn atap ótti. Elder arasyndaǵy turaqty ári ýaqtyly logıstıka mańyzdy, sondaı-aq temirjol operatorlary arasyndaǵy tájirıbelik yntymaqtastyq qajettigi de erekshe.
O. Belozerov lokomotıvterdi satyp alý týraly suraqqa jaýap berip, Qazaqstan ártúrli óndirýshilerdiń tehnıkalaryn, sonyń ishinde reseılik lokomotıvterdi de paıdalanatynyn jetkizdi.
— Qazaqstan lokomotıvterdi ártúrli elderden satyp alady. Soǵan sáıkes bizdiń reseılik lokomotıvter de Qazaqstanda qoldanylady. Budan bólek, bizde shekarada lokomotıvterdi ózara almastyrý jóninde kelisim bar. Biz Qazaqstan aýmaǵyna kirgende, Qazaqstan bizdiń aýmaqqa kirgende, eki elge de yńǵaıly tehnıkany qoldanǵan durys, — dedi ol.
Sondaı-aq, spıker másele baǵada emes, tehnıkanyń modıfıkatsııasy men paıdalaný erekshelikterinde ekenin aıtyp, reseılik lokomotıvterdiń senimdiligi men qyzmet kórsetýge qolaılylyǵyn atap ótti.
Aıta keteıik, 27-29 mamyr kúnderi Reseı Federatsııasynyń Prezıdenti Vladımır Pýtınniń Qazaqstanǵa memlekettik sapary ótip jatyr. Memleketter basshylary bul saparda Qazaqstan men Reseı arasyndaǵy jan-jaqty strategııalyq seriktestiktiń jáne odaqtastyq qatynastardyń qazirgi jaı-kúıin, sondaı-aq ony nyǵaıtý perspektıvasyn talqylaıdy.
Búgin Memleket basshysy Qasym-Jomart Toqaev Reseı Prezıdenti Vladımır Pýtındi Táýelsizdik saraıynda resmı qarsy aldy.
Buǵan deıin Reseıdiń tabıǵı resýrstar jáne ekologııa mınıstri Aleksandr Kozlov Qazaqstanǵa tartý etilgen Amýr jolbarystaryn jersindirý jóninde pikir bergen edi.
