Qazaqstan arqyly Ózbekstanǵa qansha kólemde Reseı gazy jetkiziledi
Qazaqstan arqyly Ózbekstanǵa qansha kólemde Reseı gazyn tasymaldaý josparlanyp otyr? Bul saýalǵa QR Energetıka mınıstri Almasadam Sátqalıev jaýap berdi, dep habarlaıdy Kazinform.
«Shamamen 2,8 mlrd tekshe metr gaz týraly bolyp otyr. Bul – Ózbekstan Respýblıkasynyń ótinimine sáıkes aldyn ala kelisilgen kólem. Jalpy, eldegi gaz tasymaldaý júıesi týraly aıtsaq, bizde gaz qubyrynyń basqa da jelileri boıynsha Reseı gazyn qabyldaý múmkindigimiz bar. Bul qajet bolǵan jaǵdaıda Reseı Federatsııasynyń resýrstary esebinen gaz tapshylyǵyn jabýǵa múmkindik beredi», - dedi Almasadam Sátqalıev Májilis otyrysynan keıin BAQ ókilderiniń saýalyna jaýap bere otyryp.
Sondaı-aq mınıstr elimiz gaz tranzıti úshin qosymsha aqy alatynyn málimdedi. Odan bólek, tilshiler Energetıka mınıstrliginiń basshysynan bıyl Ózbekstanǵa qansha kólemde gaz tasymaldaý josparda baryn surady.
«Biz rejımniń qalaı bolatynyn kóremiz. Degenmen kem degende 800 mln tekshe metr gaz jetkizý múmkindigi qarastyrylyp jatyr», - dedi A.Sátqalıev.
