Qazaqstan arqyly ótkizbek bolǵan 42,2 tonna taýyq eti Qytaıǵa keri qaıtaryldy

ASTANA. KAZINFORM — Elimizdiń veterınarııalyq baqylaý jáne qadaǵalaý komıtetiniń mamandary 42,2 tonna muzdatylǵan taýyq fılesiniń zańsyz tranzıtine jol bermedi. Bul týraly Aýyl sharýashylyǵy mınıstrligi habarlaıdy.

— Jetisý oblysy Panfılov aýdanyndaǵy «Nur-Joly» veterınarııalyq baqylaý beketinde Qytaı Halyq Respýblıkasynan Túrikmenstanǵa baǵyttalǵan, terisi men súıegi alynǵan 42,2 tonna muzdatylǵan taýyq fılesiniń zańsyz tranzıtine jol bermedi, — delingen habarlamada.

Atalǵan júk Qazaqstan Respýblıkasynda qus sharýashylyǵy ónimderine qatysty qoldanystaǵy ýaqytsha shekteýdi buzyp tasymaldanǵan. 

— Ýaqytsha shekteý tiri qusqa, ınkýbatsııalyq jumyrtqaǵa, mamyq pen qaýyrsynǵa, keminde 70°C temperatýrada termııalyq óńdeýden ótpegen ónimderge, qusqa arnalǵan jem men jemdik qospalarǵa (mıkrobıologııalyq jáne hımııalyq jolmen alynǵan qospalardan basqa), sondaı-aq paıdalanylǵan qus ustaýǵa, soıýǵa jáne óńdeýge arnalǵan jabdyqqa qatysty, — deıdi vedomstvodan.

Aqparatta aıtylǵan quqyq buzýshyǵa, ıaǵnı jeke tulǵaǵa qatysty ákimshilik hattama toltyryldy. 

— Ónim tolyqtaı shyqqan eli Qytaı Halyq Respýblıkasyna keri qaıtaryldy, — dep habarlaıdy AShM.

Osy oraıda Veterınarııalyq baqylaý jáne qadaǵalaý komıteti syrtqy ekonomıkalyq qyzmetke qatysýshylarǵa Qazaqstan Respýblıkasynyń aýmaǵynda qoldanylatyn veterınarııalyq-sanıtarııalyq talap pen shekteýdi qatań saqtaý qajettigin eskertedi. 

Aıta keteıik, bıyl maýsymda áleýmettik mańyzy bar 5 túrli azyq-túliktiń baǵasy tómendedi.