Qazaqstan arqyly ótken júk poıyzynan 1 019 noýtbýk urlaǵandar sottaldy
ATYRAÝ. KAZINFORM — Qazaqstan aýmaǵy arqyly Batys Eýropaǵa baǵyt alǵan tranzıttik júk konteınerlerinen qymbat tehnıka urlaǵan tórt adam sottaldy. Keltirilgen materıaldyq zalal — 632,9 mln teńge.
Kóliktegi polıtsııa departamenti bastyǵynyń birinshi orynbasary Temirjan Ramazanovtyń aıtýynsha, jedel-izdestirý is-sharalary barysynda Abaı oblysynyń tórt turǵyny ustalǵan. Tergeý málimetinshe, olar aldyn ala sóz baılasyp, júk poıyzdarynyń konteınerlerine birneshe ret zańsyz kirip, noýtbýkter men oıyn prıstavkalaryn urlaǵan.
— Byltyr mamyr aıynda Jetisý oblysyndaǵy Torpaldy stantsııasynda Qytaı — Polsha baǵytymen kele jatqan konteınerden 1 019 noýtbýk urlanǵan. Keıin urlanǵan tehnıkanyń bir bóligi Almatyda satylǵan. Urlyq saldarynan júk tıesili kompanııalarǵa jalpy somasy 632,9 mln teńge kóleminde materıaldyq zalal keltirildi, — dedi Temirjan Ramazanov.
Sotqa deıingi tergep-tekserý barysynda kólik polıtseıleri qajetti tergeý áreketterin júrgizip, urlanǵan tehnıkanyń bir bóligin tárkiledi. Qylmystyq is boıynsha fıgýranttardyń kinási tolyq dáleldendi.
— Jetisý oblysy Alakól aýdandyq sotynyń úkimimen tórt sottalýshy asa iri mólsherde urlyq jasaǵany úshin kináli dep tanyldy. Olarǵa 6 jyl 7 aıǵa deıingi merzimge bas bostandyǵynan aıyrý jazasy taǵaıyndaldy, — dep habarlady Kóliktegi polıtsııa departamentiniń baspasóz qyzmeti.
Buǵan deıin Atyraýda «Haker Atyraý» laqap atymen tanylǵan Nurlan Jańbyrbaevqa qatysty qylmystyq is qaralyp jatqanyn jazǵan edik. Oǵan birneshe márte alaıaqtyq jasady degen aıyp taǵylyp otyr.
