Qazaqstan arqyly 4 memleketke baǵyttalǵan aýǵan esirtkisiniń joly kesildi
SAMARQAND. KAZINFORM — Esirtkige qarsy kúres jónindegi Ortalyq Azııa óńirlik ortalyǵy QR Ulttyq qaýipsizdik komıtetimen birlesip, Qytaı, Azııa jáne Eýropa elderine baǵyttalǵan esirtki trafıginiń jolyn kesý boıynsha tıisti sharalar legin ázirlep jatyr, dep habarlaıdy Kazinform agenttiginiń menshikti tilshisi.
Bul týraly Samarqandta ótip jatqan otyrysta atalǵan ortalyqtyń dırektory Mahmýd Hamıdov aıtty.
— Tek sońǵy jyldary ortalyqtyń úılestirýiniń arqasynda quzyretti organdarmen 33 halyqaralyq operatsııa júrgizildi. Nátıjesinde 700 keliden astam esirtki tárkilendi, sondaı-aq qylmystyq toptardyń 25 múshesi ustaldy. Onyń ishinde Qazaqstan arqyly Ispanııaǵa, Polshaǵa, Italııaǵa jáne Nıderlandqa baǵyttalǵan aýǵan esirtkisiniń joly kesildi. Máselen, 2024 jyly aqpanda ortalyqtyń úılestirýi arqyly Qazaqstannyń Ulttyq qaýipsizdik komıteti operatsııa júrgizdi. Tıisinshe, sıntetıkalyq esirtkini Almatydan Amsterdam arqyly Barselonaǵa jóneltetin turaqty dáliz anyqtalyp, 10 keli metamfetamın tárkilendi. Sondaı-aq, top músheleri quryqtaldy. Qazirgi ýaqytta QR Ulttyq qaýipsizdik komıteti jáne ózge de seriktestermen birlesip, Qytaı, Azııa jáne Eýropa elderine baǵyttalǵan esirtki trafıginiń jolyn kesý boıynsha tıisti sharalar legi ázirlenip jatyr, — dedi Mahmýd Hamıdov.
Ortalyq dırektory keltirgen derekterge saı, bıyl 9 aıda uıymǵa múshe elderdiń aýmaǵynda 187 918 esirtki qylmysy tirkelgen. 2024 jyldyń sáıkes kezeńmen salystyrǵanda anyqtalǵan faktiler sany 13,4 paıyzǵa artqan.
— Esepti kezeńde Esirtkige qarsy kúres jónindegi Ortalyq Azııa óńirlik aqparattyq úılestirý ortalyǵyna qatysýshy memleketterde 63 323 adam ustaldy. Esirtki saýdasymen aınalysatyn uıymdasqan toptar jańa jasyryn tasymaldaý jáne taratý shemalaryn qoldana otyryp, belsendilikti arttyra bastady. Ókinishke qaraı, biz mundaı qylmystardyń barlyǵyn ýaqtyly anyqtaýǵa qaýqarly bola almaı otyrmyz, — dep másele kóterdi ortalyq dırektory.
Mahmýd Hamıdov málim etkendeı, aımaqta tek sıntetıkalyq emes, sonymen qatar jáne ózge de jańa psıhotropty zattardyń jasyryn zerthanalary kóbeıe bastady. Bıyl 9 aıda ortalyqqa múshe memleketterdiń aýmaǵynda 373 zerthana anyqtaldy. Ótken jylmen salystyrǵanda olardyń sany 42%-ǵa artqan.
— Naryqtaǵy suranys ósken saıyn, esirtki óndirisi tómendemeıdi, — dep qorytyndylady Mahmýd Hamıdov.
Aıta keteıik, atalǵan ortalyqqa qazirgi ýaqytta 7 memleket — Qazaqstan, Ózbekstan, Ázerbaıjan, Reseı, Túrikmenstan, Tájikstan jáne Qyrǵyzstan múshe.
Eske salsaq, osy is-shara barysynda baıandama jasaǵan Ózbekstan Qaýipsizdik keńesi hatshysynyń orynbasary Bahodır Tashmatov Ortalyq Azııa arqyly jylyna 90 tonnaǵa jýyq geroın ótetinin málimdedi.
Buǵan deıin habarlaǵanymyzdaı, Esirtkige qarsy kúres jónindegi Ortalyq Azııa óńirlik aqparattyq úılestirý ortalyǵynyń keńsesi Almatydan Astanaǵa kóshirilýi múmkin.