Qazaqstan arqyly 13 halyqaralyq kólik dálizi ótedi
ASTANA. KAZINFORM — Qazaqstan aýmaǵy arqyly 13 halyqaralyq kólik dálizi ótedi. Sońǵy 15 jylda eldiń kólik-logıstıkalyq ınfraqurylymyn damytýǵa 35 mlrd AQSh dollarynan astam ınvestıtsııa salyndy.
Qazaqstan Respýblıkasy kólik vıtse-mınıstri Maqsat Qalıaqparov Beıjiń qalasynda ótken Turaqty kólik jónindegi jahandyq forýmǵa qatysty. Іs-sharaǵa úkimetterdiń, kólik salasyndaǵy ýákiletti organdardyń, halyqaralyq uıymdardyń joǵary laýazymdy ókilderi, sarapshylar men bıznes-qoǵamdastyq ókilderi jınalyp, halyqaralyq kólik baılanysyn damytý, logıstıkalyq tizbekterdiń turaqtylyǵyn qamtamasyz etý, tsıfrlandyrý jáne jańa tehnologııalardy engizý máselelerin talqylady.
Óz sózinde Maqsat Qalıaqparov Qazaqstan úshin kólik-logıstıka kesheniniń strategııalyq mańyzyn atap ótip, elimizdiń Qytaı, Ortalyq Azııa, Kaspıı óńiri jáne Eýropa arasyndaǵy negizgi qurlyqtyq tranzıttik býyndardyń biri retindegi róline toqtaldy.
— Qazaqstan aýmaǵy arqyly 13 halyqaralyq kólik dálizi ótedi. Sońǵy 15 jylda eldiń kólik-logıstıkalyq ınfraqurylymyn damytýǵa 35 mlrd AQSh dollarynan astam ınvestıtsııa salyndy, — delingen Kólik mınıstrligi habarlamasynda.
Baıandamanyń negizgi baǵyttarynyń biri Transkaspıı halyqaralyq kólik baǵytyn (THKB) damytý máselesine arnaldy. Sońǵy bes jylda THKB arqyly ótetin tranzıt kólemi 3,5 esege ósti. 2025 jyly konteınerlik tasymal kólemi 77 myń DFE-ge jetti. 2029 jylǵa qaraı tranzıttik konteınerlik tasymal kólemin 300 myń DFE-ge deıin jetkizý josparlanyp otyr.
Forýmnyń mańyzdy praktıkalyq nátıjeleriniń biri — Turaqty kólik salasyndaǵy jahandyq damý jáne yntymaqtastyq bastamasynyń negizdemelik qujatyn qabyldaý boldy. Qujat turaqty kólik salasynda memleketter, halyqaralyq uıymdar, qarjy ınstıtýttary, bıznes, ǵylymı jáne bilim berý mekemeleri arasyndaǵy ózara is-qımyl úshin kópjaqty platforma qalyptastyrady.
Vıtse-mınıstr Qazaqstannyń kólik júıelerin halyqaralyq deńgeıde odan ári tsıfrlyq ıntegratsııalaýǵa, ınfraqurylymdyq jobalardy ózara baılanystyrýǵa jáne Azııa men Eýropa arasyndaǵy kedergisiz kólik baǵyttaryn qalyptastyrýǵa jaǵdaı jasaýǵa múddeli ekenin atap ótti.
Qazaqstan halyqaralyq kólik dálizderin damytý, tsıfrlyq sheshimderdi engizý, ınvestıtsııalar men tehnologııalardy tartý, sondaı-aq Eýrazııanyń kólik-logıstıkalyq júıesiniń turaqtylyǵy men básekege qabilettiligin arttyrý baǵytynda Qytaımen jáne basqa da seriktes memlekettermen yntymaqtastyqty jalǵastyra beredi.
Aıta ketelik Almatyda «Zhetysu» kólik-logıstıkalyq ortalyǵynyń qurylysy jalǵasatyn boldy.
