Qazaqstan arheologtary Ázerbaıjanda skıf-saq obalaryn izdeýde
Maqsat - ejelgi taıpalardyń Kavkaz aımaǵynda meken etýi múmkin degen boljamdy túbegeıli zertteý. Ǵalymdar birlesken qazba jumystary nátıjeli bolatynyna senimdi. Berel qorǵanyndaǵy sońǵy zertteýlerde tabylǵan jańa tarıhı derekterdi ǵalymdar skıf-saq halyqtaryn tereńirek zertteý úshin qoldanyp kórmek.
Zeınolla Samashevtyń basshylyǵymen júrip jatqan ekspedıtsııaǵa Ázerbaıjan ǵalymy da qatysty.
Onyń aıtýynsha, tabylǵan derekterdiń eń qyzyǵy tarıhı oqıǵalarǵa áser etetin skıf-saqtardyń jerleýdegi salt-dástúrinde kórinedi.
«Men úshin osy halyqtyń jerleý rásimin zertteý mańyzdyraq boldy. Sebebi sol dástúrdiń izderin Ázerbaıjan arheologııasynan anyqtaǵym keledi. Kóptegen ǵalymnyń málimdemesine qaramastan, óli deneni qabirge tapsyrý zoroastrızmmen múldem qatysy joq. Sebebi onda deneni jerleýge, órteýge bolmaıdy. Al munda biz shamanızm nemese túrik halyqtarynyń ata-baba dinine jaqyndaý rásimin baqyladyq. Skıf-saqtarynyń kóptegen eskertkishi Ázerbaıjan arheologııasynan tabyldy. Sol sebepti eki eldiń ǵalymdary birlesip, Ázerbaıjan aýmaǵynda da zertteý júrgizýdi jalǵastyrmaq», - deıdi arheologııa jáne etnografııa ınstıtýtynyń zertteýshisi Zaýr Gasanov.
Arheologtar skıf eskertkishin tapqan soń ony skıfke tıesili ekenin anyqtaı almaı, áýre bolady. Sol sebepti jerleý rásimin zertteý - óte mańyzdy is.
«Basqa arheologtar jerge kómýdiń boljaldy erekshelikterin anyqtap qoıǵan. Meniń qyzmetim -Ázerbaıjan arheologııasyndaǵy jerleý rásimderiniń ereksheligin anyqtaý. Endi qazaqstandyq arheologtarmen birigip, Zeınolla Samashevpen qorǵandardy taýyp, qazba jumystaryn jalǵastyramyz. Berel qorǵanynan tabylǵan derekter tek skıfke qatysty málimettermen shektelmeıdi. Jádigerler ǵylymǵa ǵundar men avarlar jaıly jáne Túrik qaǵanaty týraly mol maǵlumat beredi. Ǵalymnyń aıtýynsha, Altaıdaǵy osy elementterdiń damý barysyn baqylap kórý kerek. Bul ádis-tásildi taıpalardyń paıda bolýyn zertteý kezinde de qoldanýǵa bolady. «Eger olardy anyqtaı alsaq, onda biz oń nátıjelerge qol jetkizip, eki el arasyndaǵy ǵylymı qarym-qatynastardy damytýda óte mańyzdy qadam jasaımyz», - dep atap ótti ǵalym.
