Qazaqstan ardagerleri uıymdary úılestirý keńesiniń tóraǵasy bolyp Halyq Qaharmany Baqytjan Ertaev saılandy
ASTANA. 20 aqpan. QazAqparat - Astanada elimizdiń ardagerler uıymdarynyń úılestirý keńesin qurý jónindegi birinshi respýblıkalyq quryltaı sezi bolyp ótti.
QR Qorǵanys mınıstrliginiń málimetinshe, keńestiń quramyna Qarýly Kúshter, Aýǵan soǵysyna qatysqan, Chernobyl atom elektr stansysyn zalalsyzdandyrǵan ardagerler kiredi.
Shara barysynda - Qazaqstan ardagerleri uıymdarynyń úılestirý keńesin qurý, keńes tóraǵasyn taǵaıyndaý, úılestirý keńesiniń erejesin bekitý jónindegi jumys tobyn qurý týraly úsh másele qaraldy. Sezge qatysýshylar sondaı-aq Aýǵan ardagerleri jónindegi zańnyń jobasyn qarady.
Sezge jalpy úılestirý organyn qurý jónindegi bastamany kótergen QR Qorǵanys mınıstrliginiń, Respýblıkalyq «Qarýly Kúshter ardagerleri» qoǵamdyq birlestiginiń jáne Aýǵan jaýyngerleri ardagerler uıymynyń ókilder qatysty.
Keńes quramyna Qazaqstandaǵy barlyq ardagerler uıymynyń ókilderi kiretindigi josparlanyp otyr, onyń ishinde «chernobyldyqtar» birlestigi men ıadrolyq synaq aýdanynda qyzmet etken áskerıler de bar.
«Ótip jatqan ardagerler uıymynyń sezi elimiz úshin úlken mańyzy bar ekendigi sózsiz. Sizderdiń búkil ardagerler uıymdarynyń basyn qosyp Respýblıkalyq «Qarýly Kúshter ardagerleri» qoǵamdyq birlestigimen birigip úılestirý keńesin qurý jónindegi umtylystaryńyz zor mańyzǵa ıe. Búgin Úılestirý keńesin qura otyryp, onyń esiginiń basqa da ardagerler uıymdaryna ashyq ekendigin jetkizgimiz keledi. Oǵan Chernobyl atom elektr stansysyn zalalsyzdandyrǵandar, Semeı ıadrolyq synaq polıgonynda áskerı qyzmetin atqarǵan áskerı qyzmetshiler jáne basqa da ardagerler uıymdary múshe bola alady»,- dedi sezde Qazaqstan armııasynyń ardagerleri.
Úılestirý keńesiniń respýblıkalyq mártebesi bar jáne Quryltaı sezinde onyń basshylyq organdary saılandy. Qazaqstan Respýblıkasy ardagerler uıymy úılestirý keńesiniń tóraǵasy bolyp Parlament Májilisiniń depýtaty, Halyq Qaharmany zapastaǵy general-leıtenant Baqytjan Ertaev biraýyzdan saılandy.
