Toqaev: Qazaqstan árbir eldiń aýmaqtyq tutastyǵy saqtalýy kerek degen ustanymdy qorǵaıdy
ASTANA. KAZINFORM — BAQ ókilderi úshin ótkizilgen brıfıng barysynda eki el prezıdentteri álemdegi ózekti máselelerge qatysty pikir almasty, dep habarlaıdy Aqordanyń baspasóz qyzmeti.
Qazirgi kúrdeli kezeńde qarýly qaqtyǵystardyń ýshyǵýyna alańdaýshylyq bildiretinderin jetkizdi. Qazaqstan men Túrkııa prezıdentteri barlyq janjal men qaqtyǵys dıplomatııalyq kelissózder arqyly beıbit jolmen sheshilýi qajet dep esepteıdi. Bul rette Qasym-Jomart Toqaev Rejep Taııp Erdoǵannyń Reseı men Ýkraına arasyndaǵy janjaldy retteý isindegi aıryqsha rólin atap ótti.
— Bul — Sizdiń bedelińiz ben yqpalyńyzdyń aıqyn dáleli. Qos eldiń Birikken Ulttar Uıymyn reformalaý qajettiligi jónindegi ustanymy — ortaq. Qazaqstan árbir eldiń aýmaqtyq tutastyǵy saqtalýy kerek degen ustanymdy qorǵaıdy. Qazaqstan men Túrkııa halyqaralyq arenadaǵy tıimdi yqpaldastyǵyn jalǵastyra beredi. Qazaqstan dıplomatııasy Túrki memleketteri Uıymynyń odan ári damýyna basa mán bermekshi. Osy baǵytta Túrkııa tarapymen birlesip jumys isteı beremiz. Jahandyq turaqtylyq pen qaýipsizdikti qamtamasyz etý úshin kúsh-jigerimizdi biriktiremiz. Osy tusta Qazaqstannyń halyqaralyq bastamalaryna kórsetip jatqan qoldaýyna, sonyń ishinde Azııadaǵy ózara yqpaldastyq jáne senim sharalary jónindegi Keńesti damytýdaǵy Túrkııanyń úlesine erekshe rızashylyq bildiremin, — dedi Memleket basshysy.
Túrkııa Prezıdenti búgingi kelissózderdiń nátıjeli bolǵanyn atap ótti.
— Qazaqstan — aımaqtaǵy ekonomıkasy eń iri el jáne bizdiń negizgi seriktesimiz. Búgin biz qorǵanys pen energetıkadan bastap, kólik, ǵylym men tehnologııaǵa deıingi keń aýqymdy salalar boıynsha pikir almastyq. Biz taý-ken, sırek kezdesetin metaldar baǵytyndaǵy yntymaqtastyq múmkindikterin qarastyrdyq. Qazaqstan munaıyn Túrkııa arqyly álemdik naryqqa eksporttaý múmkindikterin talqyladyq. Tarıhı Jibek jolynyń qazirgi balamasy — Transkaspıı kólik baǵdaryn paıdalaný jáne damytý joldaryn qarastyrdyq, — dedi Rejep Taııp Erdoǵan.
Túrkııa Prezıdenti týrızm salasyndaǵy yntymaqtastyq perspektıvasyna toqtalyp, túrik azamattaryna Qazaqstanda 90 kún vızasyz júrýge ruqsat berý týraly sheshim qabyldaǵany úshin Memleket basshysyna rızashylyǵyn bildirdi.
Sóz sońynda Qasym-Jomart Toqaev búgingi kelissózderdiń tabysty ótkeni úshin Rejep Taııp Erdoǵanǵa alǵys aıtyp, Túrkııa Prezıdentin ózine yńǵaıly ýaqytta Qazaqstanǵa saparmen kelýge shaqyrdy.
Budan buryn Qasym-Jomart Toqaev pen Rejep Taııp Erdoǵan BAQ ókilderi úshin brıfıng ótkizgenin jazǵanbyz.
Brıfıng barysynda Toqaev Qazaqstannyń Túrkııaǵa salǵan ınvestıtsııasynyń kólemi 2,5 mlrd dollardan asqanyn aıtty.
Sonymen qatar Memleket basshysy Túrkııanyń qorǵanys jáne áskerı-tehnıkalyq baǵyttaǵy zor jetistikterine nazar aýdaryp, Rejep Taııp Erdoǵandy jaqynda IDEF 2025 halyqaralyq qorǵanys-ónerkásip kórmesiniń sátti ótýimen quttyqtady.