Qazaqstan Aral óńiriniń ekologııalyq máselelerin sheshýde tsıfrlyq tehnologııalardy qoldanýdy usyndy
ASTANA. KAZINFORM- Qazaqstannyń Ekologııa jáne tabıǵı resýrstar mınıstri Álibek Qýantyrov Eýropalyq ekonomıkalyq palatanyń (EEIGCham) komıssary Nelson Fernandeshpen kezdesýde Aral óńiriniń ekologııalyq máselelerin sheshý úshin zamanaýı tsıfrlyq tehnologııalardy qoldaný múmkindikterin qarastyrýdy usyndy.
QR Ekologııa jáne tabıǵı resýrstar mınıstrligi baspasóz qyzmetiniń habarlaýynsha, kezdesý barysynda taraptar tabıǵatty qorǵaý qyzmetin tsıfrlandyrý, jasandy ıntellekt tehnologııalaryn engizý jáne ekologııalyq mindetterdi sheshý úshin zamanaýı taldamalyq quraldardy qoldaný salasyndaǵy yntymaqtastyqtyń perspektıvalaryn talqylady.
Portýgalııalyq kompanııanyń tsıfrlandyrý jáne ınnovatsııalyq tehnologııalyq sheshimderdi ázirleý salasyndaǵy tájirıbesine erekshe nazar aýdaryldy. Qazaqstandyq tarap usynylǵan tásildermen jáne olardy ekologııalyq salada praktıkalyq qoldaný múmkindikterimen tanysty.
Mınıstr tsıfrlyq transformatsııa Qazaqstannyń memlekettik saıasatynyń basym baǵyttarynyń biri ekenin atap ótti. Atap aıtqanda, mınıstrlik orman sharýashylyǵy, ekologııalyq monıtorıng jáne tabıǵı tótenshe jaǵdaılardyń aldyn alý salalarynda tsıfrlyq sheshimderdi dáıekti túrde engizip keledi.
Qazirgi ýaqytta Qazaqstanda orman órtteriniń monıtorıngin, táýekelderdi taldaýdy jáne jedel den qoıýdy úılestirýdi qamtamasyz etetin Respýblıkalyq jedel basqarý ortalyǵy jumys isteıdi.
-Kezdesýde Aral teńiziniń ekologııalyq syn-qaterleri de jeke talqylandy. Mınıstr Aral óńiriniń ekojúıelerin qalpyna keltirý jónindegi is-sharalardyń tıimdiligin arttyrý úshin zamanaýı tsıfrlyq tehnologııalardy qoldaný múmkindikterin qarastyrýdy usyndy,-delingen habarlamada.
Kezdesý qorytyndysy boıynsha taraptar saraptamalyq dıalogty jalǵastyrýǵa jáne tsıfrlandyrý men qorshaǵan ortany qorǵaý salalaryndaǵy praktıkalyq yntymaqtastyqtyń perspektıvalyq baǵyttaryn pysyqtaýǵa qyzyǵýshylyq bildirdi.
Aıta keteıik, osyǵan deıin Qazaqstannyń sý dıplomatııasy men Syrdarııadaǵy sý rejımin úılestirý Soltústik Aralǵa túsetin aǵyndy turaqtandyrýǵa múmkindik berdi. Sonyń nátıjesinde teńizdiń kólemi 2023 jylǵy 18,4 tekshe shaqyrymnan 23,5 tekshe shaqyrymǵa deıin ósti.
