Qazaqstan Ánurany araǵa 32 jyl salyp qysqy Olımpıada tórinde taǵy shyrqaldy
MILAN. KAZINFORM — Qazaqstan quramasy Italııanyń Mılan jáne Kortına-d’Ampetstso qalalarynda ótip jatqan XXV qysqy Olımpıada oıyndarynda alǵashqy júldesin jeńip aldy.
Erler arasynda mánerlep syrǵanaýda otandasymyz Mıhaıl Shaıdorov 291.58 upaımen chempıon atandy.
Aıta keterligi, bul Qazaqstan quramasynyń 2026 jylǵy qysqy Olımpıadasyndaǵy alǵashqy júldesi. Sonymen qatar ulttyq qurama araǵa 32 jyl salyp óz tarıhynda qysqy sport túrlerinen ekinshi altyn medal qanjyǵalady.
Qazaqstan táýelsizdigin alǵannan keıin alǵash ret 1994 jylǵy Lıllehammerde (Norvegııa) ótken qysqy Olımpıada oıyndaryna qatysyp, shańǵyshy Vladımır Smırnov el qorjynyna alǵashqy qysqy Olımpıada oıyndarynyń altyn júldesin syılaǵan.
Sonymen qatar Qazaqstan qysqy Olımpıada oıyndarynda araǵa 8 jyl salyp júlde enshiledi. Sońǵy ret frıstaıl-mogýlshy ıÝlııa Galysheva Phenchhanda (Ońtústik Koreıa) ótken qysqy Olımpıadada qola medal jeńip alǵan.
Sondaı-aq Qazaqstan óz tarıhynda mánerlep syrǵanaý sportynan ekinshi Olımpıada júldesin enshilep otyr. Osyǵan deıin Denıs Ten 2014 jyly Sochı Olımpıadasynda qola medal jeńip alǵan edi.
Osyǵan deıin habarlaǵanymyzdaı, Qazaqstan quramasy ótken 8 qysqy Olımpıada oıyndarynda 8 medal enshiledi. Onyń ishinde 1 altyn, 3 kúmis jáne 4 qola medal bar.