Qazaqstan Arab memleketteri lıgasy jáne IYU kezekten tys sammıtinde qandaı máselelerdi kóterdi
ASTANA. KAZINFORM - Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Palestına máselesin retteý jáne Lıvandaǵy jaǵdaıdy turaqtandyrý boıynsha Arab memleketteri lıgasy (AML) men Islam yntymaqtastyǵy uıymynyń (IYU) birlesken kezekten tys Sammıtine qatysty.
Bul týraly QR Syrtqy ister mınıstrliginiń baspasóz qyzmeti habarlady.
Іs-shara barysynda múshe memleketterdiń ókilderi geosaıası ahýaldy, ıslam álemi aldynda turǵan syn-qaterler men qaýipterdi, sonyń ishinde Taıaý Shyǵystaǵy qazirgi tańdaǵy oqıǵalardy talqylady.
Óz sózinde M.Nurtileý IYU-nyń óńirdegi musylman úmbetiniń elderinde beıbitshilik pen turaqtylyqty qamtamasyz etý máselelerine belsendi qatysýynyń mańyzdylyǵyn atap ótip, IYU men AML múshelerin osy ýaqytta bolyp jatqan qaqtyǵystardy tez arada retteý boıynsha naqty usynystar ázirleýge shaqyrdy.
QR syrtqy saıası vedomstvosynyń basshysy halyqaralyq qaýymdastyqtyń Golan shyńdarynda, Lıvanda jáne álemniń basqa aımaqtaryndaǵy BUU-nyń bitimgershilik mıssııalarynyń mańyzdy rólin esten shyǵarmaýy kerektigin erekshe atap ótti.
Osyǵan baılanysty BUU-nyń bitimgershilerine jáne dıplomatııalyq mıssııalarǵa jasalǵan shabýyldardyń halyqaralyq jáne gýmanıtarlyq quqyqtyń óreskel buzylýy bolyp tabylatyndyǵy jáne oǵan jol bermeý qajettiligi atalyp ótti.
Qazaq delegatsııasynyń basshysy sondaı-aq IYU-ǵa múshe memleketterdi Azyq-túlik qaýipsizdigi jónindegi ıslam uıymynyń áleýetin paıdalanýǵa jáne zardap shekken Palestınanyń turǵyndaryna azyq-túlikpen kómek kórsetý úshin osy Uıymnyń qarjy jınaý bastamasyn qoldaýǵa shaqyrdy.
Sammıt aıasynda QR syrtqy saıası vedomstvosynyń basshysy Brýneı Syrtqy ister mınıstri Erıvan ıÝsýfpen, Gvıneıa-Bısaý Syrtqy ister mınıstri Karlos Pınto Pereıramen, Kýveıt Syrtqy ister mınıstri Abdýlla Alı Ál-ıAhıamen, Qyrǵyzstan Syrtqy ister mınıstri Jeenbek Kýlýbaevpen, Malı Syrtqy ister mınıstri Abdýlaı Dıoppen, Marokko Syrtqy ister mınıstri Nasser Býrıtomen, Oman Syrtqy ister mınıstri Badr bın Hamad Ál-Býsaıdımen, Saýd Arabııasy Syrtqy ister mınıstri Faısal bın Farhan Ál Saýdpen jáne Týnıs Syrtqy ister mınıstri Muhamed Alı Naftımen ekijaqty kezdesýler ótkizip, olardyń barysynda taraptar saıası, saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy ekijaqty yntymaqtastyqtyń ózekti máselelerin talqylady.
Osyǵan deıin Qasym-Jomart Toqaev Qazan qalasynda ótken BRIKS-tiń plenarlyq otyrysynda sóılegen sózinde Taıaý Shyǵystaǵy ahýaldyń ýshyǵýyna alańdaýshylyq bildirgen edi.
