Qazaqstan APV-ǵa qarsy vaktsınatsııalaýdy engizý boıynsha tájirıbesimen bólisedi

ASTANA. KAZINFORM – 4-8 qarasha aralyǵynda Shymkentte qazaqstandyq mamandar Tájikstannan kelgen delegatsııaǵa Qazaqstanda adam papılloma vırýsyna qarsy vaktsınatsııalaýdy engizý tájirıbesimen bólisedi. Bul týraly Sanıtarııalyq-epıdemıologııalyq baqylaý komıtetiniń baspasóz qyzmeti málim etti.

Іs-sharany DDU-nyń Qazaqstandaǵy eldik keńsesi jáne QR DSM Sanıtarııalyq-epıdemıologııalyq baqylaý komıteti tájikstandyq áriptesteriniń ótinishi boıynsha uıymdastyrýda. Olar APV-ǵa qarsy vaktsınatsııalaýdy josparlaý jáne júrgizý tásilderin zerdeleýge qyzyǵýshylyq tanytqan. Bul shara ásirese, Tájikstannyń APV-ǵa qarsy vaktsınatsııalaý baǵdarlamasyn engizýge daıyndyǵy aıasynda erekshe mańyzǵa ıe ekenin atap ótken jón.

Jumys sapary aıasynda APV-ǵa qarsy vaktsınatsııalaýdy engizýge daıyndyq, ulttyq jospardy ázirleý boıynsha tájirıbe almasý, medıtsınalyq personaldy oqytý, kommýnıkatsııalyq materıaldardy ázirleý úshin oqytý semınarlary ótedi. DDU-nyń Eýropalyq aımaǵynda, onyń ishinde Qazaqstanda, Tájikstanda jatyr moıny obyrynyń aýyrtpalyǵy, APV-ǵa qarsy vaktsınatsııalaý úshin nysanaly topty tańdaý negizdemesi, mektepte vaktsınatsııalaý strategııasy, vaktsınalardyń tıimdiligi men qaýipsizdigin qamtamasyz etý, óńirlerdiń APV-ǵa qarsy vaktsınatsııalaýǵa daıyndyǵyn syrtqy baǵalaý boıynsha baıandamalar usynylýda.

Sonymen qatar, ata-analardyń APV vaktsınatsııasyna qatysty túbegeıli sheshimge kelmeýi, halyq arasynda túsindirý jumystaryn arttyrý sharalary týraly zertteý nátıjelerin talqylaýǵa barynsha kóńil bólinýde.

Sondaı-aq, tájirıbe almasý aıasynda Shymkent qalasy men Túrkistan oblysynyń aýdandaryndaǵy emhanalar men mektepterge tanysý saparlary josparlanǵan.

Eske salsaq, elimizde 5 myńǵa jýyq jetkinshek APV-ǵa qarsy vaktsına aldy.