Qazaqstan AÓK ónimderin shetelge qanshalyqty eksporttap jatyr

NUR-SULTAN. QazAqparat – Aýyl sharýashylyǵy mınıstrliginiń agroónerkásip keshenindegi memlekettik ınspektsııa komıtetiniń tóraǵasy Mars Almabek Qazaqstannyń agroónerkásip kesheni ónimderiniń eksporttyq áleýeti týraly aıtyp berdi, dep habarlaıdy QazAqparat tilshisi.

«Memleket basshysy aýyl sharýashylyǵy salasynda eńbek ónimdiligin arttyryp, óńdelgen aýyl sharýashylyǵy ónimderiniń ósimin 2022 jylǵa qaraı eki jarym ese arttyrý týraly tapsyrma bergen edi. 2019 jyly AÓK salasyndaǵy ónim eksporty 12,41 mln tonnany qurap, somasy 3,29 mlrd dollarǵa jetti. Bul kórsetkish 2018 jylmen salystyrǵanda 6,4 paıyzǵa nemese 198 mln dollarǵa artyq», - dedi Mars Almabek aýyl sharýashylyǵy mınıstrliginiń alqa májilisinde.

Komıtet tóraǵasynyń sózine sensek, byltyr agroónerkásip salasyndaǵy qazaqstandyq ónimniń 551 túri álemniń 72 eline eksporttalǵan.

«Eksporttyq nomenklatýranyń 50,2 paıyzy qaıta óńdelgen aýyl sharýashylyǵy ónimderine tıesili. Eksporttalatyn ónimderdiń tizimin uzartýǵa aýyl sharýashylyǵy óndirisin ártaraptandyryp, qaıta óńdeý isin jetildirýdiń arqasynda qol jetkizilip otyr. Qazirgi tańda áleýetti naryqta qazaqstandyq AÓK ónimderiniń eksporty artyp keledi», - deıdi ol.

Komıtet basshysy esep bergendeı, Qytaıǵa baǵyttalǵan ónim eksporty - 50,5 paıyzǵa (jalpy eksport kólemi - 388 mln dollar), Parsy shyǵanaǵy elderine - 3,2 ese nemese 11,5 mln dollarǵa (Katar, Kýveıt, BAÁ, Saýd Arabııasy, Oman, Bahreın), Ortalyq Azııa elderine (Ózbekstan, Aýǵanstan, Tájikstan, Qyrǵyz Respýblıkasy, Túrikmenstan) - 7,4 paıyzǵa, EAEO elderine 8,2 paıyzǵa (598,0 mln dollar) ósken.