Qazaqstan AÓK ónimderi eksportyn 600 mln. dollarǵa ulǵaıtpaq

ASTANA. QazAqparat - Qazaqstan agroónerkásip kesheni ónimderiniń eksport kólemin 600 mln. dollarǵa ulǵaıtýdy josparlaýda. Bul jaıynda búgin «Jibek jolynyń ǵylymı ınnovatsııasy jáne aýyl sharýashylyǵy bilimi alıansynyń» 2-shi otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.

«Aǵymdaǵy jyldyń aqpanynda QR Prezıdenti Qazaqstan Respýblıkasynyń agroónrkásip keshenin damytýdyń jańa 5 jyldyq memlekettik baǵdarlamasyn bekitti. Ol naryqta suranysqa ıe, básekege qabiletti ónim shyǵarýǵa baǵyttalǵan. Ony júzege asyrý aýyl sharýashylyǵynyń jıyntyq óniminiń kólemin 30 protsentke, al agroónerkásip kesheni ónimderi eksportyn 600 mln. dollarǵa arttyrýǵa múmkindik beredi», - dedi ol.

Birinshi vıtse-mınıstr Qazaqstannyń biregeı aýyl sharýashylyǵy áleýeti onyń Jibek joly óńiri naryǵyna sapasy joǵary, ekologııalyq turǵyda taza aýyl sharýashylyǵy ónimderiniń negizgi jetkizýshi bolýyna múmkindik beretinin atap ótti.

«Taıaý Shyǵys pen Ortalyq Azııa elderi qazirdiń ózinde bizdiń dástúrli eksporttyq naryǵymyzǵa aınalyp otyr. Qazaqstannyń aýyl sharýashylyǵy ónimderin QHR, Reseı jáne Eýropaǵa eksportqa shyǵarý keleshegi óte zor. Sondyqtan bizdiń mundaı formattaǵy yntymaqtastyǵymyz baǵdarlamamyzdy tabysty júzege asyrý úshin aıryqsha mańyzǵa ıe»,- dedi Qaırat Aıtýǵanov.