Qazaqstan Ánurany boıynsha túsinikteme hattar barlyq shetel elshilikterine joldandy
Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Mádenıet jáne sport vıtse-mınıstri Sáken Musaıbekov málim etti.
«Qazaqstanda sońǵy 2-3 jyldyń ishinde aýyr atletıkadan, bokstan, dzıýdodan álem chempıonattary men Azııa birinshilikteri jáne halyqaralyq gran-prı jarystary ótti. Bizdiń elde ótken sharalarda birde-bir ret qatysýshy memleketterdiń Ánuranyna qatysty daý-damaı týǵan emes. Menińshe, bul uıymdastyrýshy memleketke baılanysty. Biz eshkimniń kóńilin qaldyrmaý úshin osy máseledegi jumystardy óte muqııat atqaramyz», - dedi S.Musaıbekov.
Onyń aıtýynsha, Qazaqstan Ánuranyna qatysty túsinikteme hattar barlyq shetel elshilikterine joldandy.
«Іri sporttyq jarystarda Qazaqstan Ánuranyna qatysty týyndaǵan olqylyqtardan keıin, arnaıy túsinikteme hattar Qazaqstanda tirkelgen barlyq shetel elshilikterine joldandy. Ol týraly biz ózimizdiń bapkerlermen jáne sportshylarmen sóılestik, barlyǵy ony biledi. Biraq uıymdastyrýshylardan qate ketip jatady. Múmkin sol eldegi bilim berý deńgeıiniń tómendigi bolsa kerek, olar álem rekordyn jańartyp, olımpıada medaldaryn jeńip alyp jatqan sportshylardyń memlekettik Ánurandaryn teksermeıdi. Barlyǵy uıymdastyrýshylarǵa baılanysty», - dep kesti vıtse-mınıstr.
Eske sala keteıik, bıyl Qazaqstan Ánuranyna qatysty úsh birdeı qatelik ketti. Aldymen qarasha aıynda «barys» Iokerıt» matchynda eski Ánuran shyrqalsa, dál osyndaı jaǵdaı Groznyıda aýyr atletıkadan ótken RF prezıdenti kýboginde Ilıa Ilın jáne Zagrebte Denıs Tenmen oryn alǵan bolatyn.
