Qazaqstan Antarktıdada polıarlyq stansany ashýǵa nıetti
ASTANA. QazAqparat - Ǵalymdar Týrızm jáne geografııa ǵylymı-zertteý ınstıtýtymen birlese QR Úkimetine Antarktıdada Qazaqstannyń polıarlyq stansasyn ashýdy usynbaq. Bul týraly búgin QazAqparat tilshisine bergen suhbatynda birinshi qazaqstandyq Ońtústik polıýs ǵylymı ekspedıtsııasynyń qatysýshysy, geografııa ǵylymdarynyń doktory, L.N Gýmılev atyndaǵy EUÝ professory Ordenbek Mazbaev málim etti.
«Bizdiń ekspedıtsııa jasaǵanymyzǵa bes jyl ótti. Osy oraıda Qazaqstannyń Antarktıda jónindegi Halyqaralyq kelisimge qosylýyn jáne ony mindetti ratıfıkatsııalaǵanyn qalaımyz. Jaqyn arada qazaqstandyq polıarlyq stansany ashýymyz qajet. Týrızm jáne geografııa ǵylymı-zertteý ınstıtýty arqyly biz osy máseleni Úkimet deńgeıinde kótermekpiz»,-dedi ol.
Onyń sózine qaraǵanda, 2041 jyly bul kelisimniń kúshi joıylady jáne qatysýshylar arasynda Antarktıdany bólý bastalady. «Qazirgi kezde Qytaıda tórt stansa bar. Reseıdiń enshisinde Keńes Odaǵynyń barlyq stansalary qaldy. Belarýs, Ýkraına, Latvııa, Estonııa kelisimge qatysýshy elder retinde tirkelip, ózderiniń stansalaryna ıelik etýde. Bizge stansa qazaqstandyq ǵylymdy, ıaǵnı bılogııany, medıtsınany, klımatologııany, psıhologııany jáne geografııany damytý úshin qajet. Atap aıtqanda, bul jer zertteý jumystaryn júrgizý alańy bolyp tabylady»,-dedi O. Mazbaev.
Qazirgi tańda Antarktıda týraly kelisim boıynsha jáne ońtústik polıýs týraly halyqaralyq kelisim boıynsha bul aımaqta tek qana ǵylymı-zertteý jumystary júrgiziledi.
