Qazaqstan ana ólimin aıtarlyqtaı tez tómendetken on eldiń qataryna kirdi

ASTANA. KAZINFORM —  Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken Ornyqty damý jónindegi úılestirý keńesiniń otyrysynda Ornyqty damý maqsattary jónindegi (ODM) úshinshi erikti ulttyq sholýdyń tusaýkeseri ótti. 

BUU-nyń Qazaqstandaǵy turaqty úılestirýshisiniń mindetin atqarýshy Stıven O' Mallı usynylǵan qujattyń jaı ǵana esep emestigin, Qazaqstannyń BUU-nyń 2030 kún tártibine shynaıy berilgendiginiń kórinisi men barlyq álemge elimizdiń ilgerileýi, sabaqtary men ambıtsııalary týraly aıtý múmkindigi ekenin atap ótti.

— Qazaqstan — sholýdy úsh jylda bir ret ótkizetin sanaýly elderdiń biri. Bul ODM boıynsha progress monıtorıngindegi, ashyqtyqty ilgeriletýdegi naǵyz kóshbasshylyǵyn aıqyn kórsetedi. Jaqynda Almatyda ashylǵan BUU-nyń Ortalyq Azııa men Aýǵanstan úshin ornyqty damý maqsattary jónindegi óńirlik ortalyǵy Qazaqstannyń ODM-ny elde de, aımaqta da iske asyrýǵa beıildiligin kórsetedi. BUU turǵysynan mundaı sholýlardy júrgizý shynaıy áriptestik pen is-qımylǵa shaqyrý retinde baǵalanady. BUU Qazaqstan úkimetin tolyǵymen qoldaıdy, — dep atap ótti Stıven O' Mallı.

Ulttyq ekonomıka vıtse-mınıstri Asan Darbaev úshinshi qujatta ODM-ny jergilikti jerge beıimdeýge, ıaǵnı jahandyq maqsattardy aımaqtar men jergilikti qoǵamdastyqtar deńgeıine kóshirý máselelerine erekshe nazar aýdarylǵanyn aıtty. Sondaı-aq Sholý 2025-tiń basty ereksheligi — azamattyq qoǵamnyń, ǵylymı-saraptamalyq qoǵamdastyqtyń jumysyna belsendi qatysý.

— Ekinshi erikti ulttyq sholý usynylǵan sátten bastap ODM-ny iske asyrýdyń ınstıtýtsıonaldyq negizderin jetildirýde eleýli nátıjelerge qol jetkizildi: 2023 jyly Qazaqstannyń ornyqty damýy salasyndaǵy ulttyq maqsattary men mindetterin iske asyrý monıtorıngi jónindegi parlamenttik komıssııa quryldy. 2060 jylǵa deıin eldiń kómirtegi beıtaraptyǵyna qol jetkizý strategııasy qabyldandy. Ornyqty damý maqsattarynyń tıimdi monıtorıngin qamtamasyz etý úshin ODM ulttyq ındıkatorlary ózektendirilip, jalpy sany búginde 200-ge jetkizildi, — dedi Asan Darbaev.

Ekonomıkalyq zertteýler ınstıtýtynyń basqarma tóraǵasy Ásel Sársenbaevanyń aıtýynsha, ODM «Eshkimdi artta qaldyrmaý» qaǵıdatyna sáıkes daıyndalǵan Úkimet tarapynan da, azamattyq qoǵam tarapynan da iske asyrylýdy baǵalaýdy kórsetedi. Ol jurtshylyq pikirin eskere otyryp aıqyndalǵan basym maqsattardyń oryndalýy týraly aqparat usyndy.

— Úkimet Ornyqty damý maqsaty boıynsha jáne jahandyq syn-tegeýrinderge jaýap retinde eńbek naryǵynyń talabyna sáıkes bıznesti qoldaý men kadr daıarlaý sharasyn júıeli túrde qabyldaýda, — dep atap ótti Ásel Sársenbaeva.

Ol, azamattyq qoǵam áleýmettik kodeks áleýmettik saıasattyń negizin nyǵaıtty dep sanaıdy. Qazaqstan ana ólimin tez tómendetken (DDU baǵalaýy boıynsha) on eldiń qataryna kiredi. Genderlik teńdik salasynda memleket deńgeıinde de, jeke sektorda da ilgerileý baıqalady. Onda iri kompanııalar genderlik strategııalar men harassmentke qarsy is-qımyl saıasatyn engizedi. Quqyqtyq mádenıettiń ósýi sot júıesine qoıylatyn jańa talaptarǵa ákelýde. Qoǵam ony odan ári jaqsartýdy kútetini oryndy.

Úılestirý keńesin qorytyndylaı kele, Serik Jumanǵarın Ornyqty damý maqsattarynyń qaǵıdattaryn engizý birinshi kezekte halyqtyń ómir súrý sapasyn arttyrýǵa, úzdik halyqaralyq standarttardy qabyldaýǵa baǵyttalǵanyn, bul tutastaı alǵanda eldiń halyqaralyq arenadaǵy bedelin nyǵaıtýǵa yqpal etetinin atap ótti.

Keńes qatysýshylary Qazaqstannyń úshinshi erikti ulttyq sholýyn maquldady. Endi qujat osy shildede Nıý-Iorktegi joǵary deńgeıdegi Saıası forýmda usynylady.

Aıta ketelik eger bala shetelde týǵan bolsa, onyń qujattaryn qalaı rásimdeý kerektigin jazǵan edik.