Qazaqstan Aljırge 390 myń tonna bıdaı eksporttady
ASTANA. KAZINFORM — 2025 jyldyń qańtar–qarasha aılary aralyǵynda Qazaqstan alǵash ret Aljırge 390 myń tonna kóleminde bıdaı eksporttady. Eksport quny 100 mln AQSh dollarynan asty, dep habarlaıdy SІM baspasóz qyzmeti.
Buǵan 2025 jyly Qazaqstandaǵy kólik shyǵyndaryn memlekettik sýbsıdııalaý, sondaı-aq syrtqy saıasat deńgeıindegi eleýli qoldaý aıtarlyqtaı yqpal etti.
Memleket basshysynyń qazaqstandyq aýyl sharýashylyǵy ónimderin halyqaralyq naryqtarǵa ilgeriletý jónindegi tapsyrmasyna sáıkes, Qazaqstannyń Aljırdegi elshiligi bul soltústikafrıkalyq eldiń negizgi memlekettik uıymdary men vedomstvolarynyń basshylyǵymen kelissózder júrgizdi.
2025 jylǵy 14 qańtarda elshi Ánýarbek Ahmetov bıdaı men burshaq daqyldaryn ortalyqtandyrylǵan memlekettik ımporttyq satyp alýdy úılestiretin Aljır dándi daqyldar jónindegi kásipqoı aralyq keńsesiniń (OAIC) Bas dırektory Nasreddın Messaýdpen kezdesti. Kezdesý barysynda oǵan «Azyq-túlik kelisimshart korporatsııasy» UK» AQ usynǵan zerthanalyq zertteýlerdiń nátıjeleri bar qazaq bıdaıynyń úlgileri usynyldy. OAIC basshysy bizdiń bıdaıdyń sapasyna joǵary baǵa berip, ony Aljır naryǵyna jetkizýdi uıymdastyrýǵa qyzyǵýshylyq tanytty.
2025 jylǵy 22 maýsymda Á.Ahmetov Aljırdiń Aýyl sharýashylyǵy mınıstri ıÝsef Sherfamen kelissózder júrgizip, ol Qazaqstanmen aýyl sharýashylyǵy salasyndaǵy jan-jaqty yntymaqtastyqty, onyń ishinde Aljırge bizdiń astyqty jetkizýdi keńeıtýge saıası qoldaý bildirdi.
Jalpy, Qazaqstannyń Aljırge bıdaıdan bólek, et, burshaq jáne basqa da aýyl sharýashylyǵy ónimderiniń túrlerin eksporttaý múmkindigi zor.
Aıta keteıik, Aljır bıdaıdyń álemdegi eń iri ımporttaýshylarynyń biri bolyp sanalady: ol jahandyq reıtıngte besinshi orynda tur jáne jyl saıyn 9 mln tonnaǵa deıin jumsaq bıdaı satyp alady. Jetkizilimder memleket tarapynan ortalyqtandyrylǵan túrde, halyqaralyq tenderlerdi turaqty túrde ótkizip otyratyn Aljırdiń Aralyq astyq ofısi arqyly ǵana júzege asyrylady.
Budan buryn Aljır prezıdenti jańa úkimet quramyn bekitkenin jazǵanbyz.