Qazaqstan alıýmınıı folgasy men elektrodtardy eksporttaýǵa shekteý engizedi
ASTANA. KAZINFORM — Qazaqstan Eýrazııalyq ekonomıkalyq odaq elderine ónerkásip ónimderiniń jekelegen túrlerin eksporttaýǵa shekteý engizedi. Tıisti buıryqqa Ónerkásip jáne qurylys mınıstri 2026 jylǵy 5 qarashada qol qoıdy.
Shekteý taýarlardyń eki sanatyna qatysty bolady.
Birinshisi — belgili bir ólshemder men sıpattamalarǵa sáıkes keletin, oram túrinde jetkiziletin alıýmınıı folgasy. Ony eksporttaýǵa 2030 jylǵy 15 qarashaǵa deıin tyıym salynady.
Ekinshi sanatqa ónerkásiptik peshterde qoldanylatyn dóńgelek qımaly grafıttelgen elektrodtar jatady. Olardy EAEO elderine eksporttaýǵa 2031 jylǵy 17 qańtarǵa deıin shekteý qoıylady.
Alaıda alıýmınıı folgasyna qatysty erekshelik qarastyrylǵan. Shekteýdiń dempıngke qarsy baj tólenip, Qazaqstanǵa ákelingen Qytaıda óndirilgen ónimderine qatysy joq. Sondaı-aq, buıryqta mundaı baj tólenbesten, birjolǵy lıtsenzııalar boıynsha jetkizilgen taýarlarǵa qatysty da jekelegen erekshelikter kózdelgen.
Qujat 2026 jylǵy 22 qarashadan bastap kúshine enedi.
Aıta keteıik, buǵan deıin bıtým eksportyna qoıylǵan shekteý merziminen buryn alynatynyn jazǵanbyz.
