Qazaqstan altyn valıýta rezervteri $1,9 mlrd. dollarǵa ulǵaıdy
ALMATY. QazAqparat - 2016 jyly Qazaqstan altyn valıýta rezervteri $1,9 mlrd. dollarǵa ulǵaıdy. Bul týraly jýrnalısterge bergen brıfıngide QR Ulttyq bankiniń basshysy Danııar Aqyshev aıtty.
«Ulttyq bank 2016 jylǵy qyrkúıekten bastap jeltoqsanǵa deıin tórt aı qatarynan valıýta naryǵynda óktemdik júrgizgen joq. Sondyqtan aıyrbastaý baǵamynyń irgeli úrdisine bizdiń áserimiz nólge teń boldy», - dedi ol.
Onyń aıtýynsha, baǵamnyń qalyptasýyna Ulttyq banktiń aralaspaý saıasaty birte-birte óz yqpalyn kórsetip keledi. Ásirese, bul altyn valıýtalyq rezervtiń qalyptasýyna áserin tıgizýde.
«Ulttyq banktiń altyn valıýta rezervteri jeltoqsannyń sońynda, bastapqy derekter boıynsha, jyl basynan bastap $1,9 mlrd. dollarǵa ulǵaıyp, $29,8 mlrd. dollardy qurady. Ulttyq qordyń shetel valıýtasyndaǵy valıýta aktıvteri jyldyń sońynda $61 mlrd. dollar boldy. Jalpy halyqaralyq rezervter $90,8 mlrd. nemese ІJÓ-den 68% boldy», - dedi D. Aqyshev.
