Qazaqstan altyn qory boıynsha álemde 16-orynda - Ulttyq bank

ASTANA. QazAqparat - Qazaqstan altyn qory boıynsha álemde 16-orynda tur. Bul jaıynda Májilistegi «Aqjol» fraktsııasynyń  depýtattyq saýalyna jaýap bergen Ulttyq bank tóraǵasy Danııar Aqyshev málim etti, dep habarlaıdy QazAqparat tilshisi.

«Qazirgi ýaqytta Ulttyq banktiń altyn-valıýta rezervteriniń qurylymyndaǵy altyn kólemi 42,3 paıyzǵa jetti. Bul tarıhı turǵydan eń joǵary shama (altynnyń eń az 7,2 paıyz úlesi 2006 jyly baıqaldy) bolyp tabylady. Qun boıynsha bul kólem 12,9 mlrd AQSh dollaryn, al naqty shamada 323 tonnany quraıdy. Dúnıejúzilik altyn jónindegi keńestiń derekteri boıynsha Qazaqstan altyn rezervteri boıynsha álemde 16-shy orynda», - dep atap ótedi Danııar Aqyshev.

Onyń aıtýynsha, altyn kólemi 2011 jyldan beri aıtarlyqtaı ósti. Ol kezde Ulttyq bankke zańnamalyq deńgeıde otandyq óndirýshilerden tazartylǵan altyndy basymdyqpen satyp alý quqyǵy berilgen edi.

«Tıisinshe, Ulttyq banktiń naqty altynynyń edáýir kólemi ony geosaıası táýekelderden qorǵaı otyryp, Qazaqstannyń aýmaǵynda saqtalýda. Naqty altyn depozıtke ornalastyrýǵa bolatyn allokırlenbegen altynǵa qaraǵanda kiris ákelmeıtinin atap ótemin», - dedi ol.