Qazaqstan alty elge benzın eksporttaýdy kózdep otyr

ASTANA. QazAqparat - Qazaqstan aldaǵy aılardyń ishinde Qyrǵyz Respýblıkasy, Armenııa, Belarýs, Ózbekstan, Tájikstan men Aýǵanstan elderine benzındi eksporttaýdy bastamaq. Bul týraly OKQ-da ótken baspasóz máslıhatynda Energetıka mınıstri Qanat Bozymbaev málim etti, dep habarlaıdy QazAqparat tilshisi.

«Qyrǵyzstannan bir apta buryn jaýap keldi. Osy aptada nemese qańtardyń alǵashqy onkúndiginde tıisti organdamen kelisip alsaq, meniń orynbasarymdy Qyrǵyzstanǵa jiberetin bolamyz. Qol qoısa (...), aqpan aıynan bastap Qyrǵyzstanǵa eksportty bastaımyz. Osyndaı máselelerdi Armenııa jáne Belarýspen de talqylap jatyrmyz. Olardyń ózderi «benzındi satyp alaıyq» dep surap jatyr. Sondyqtan, bul másele Eýrazııalyq ekonomıkalyq odaqqa kiretin memlekettermen talqylaný ústinde», - dedi mınıstr.

Sonymen birge, Qanat Bozymbaev Eýrazııa ekonomıkalyq odaǵyna enbeıtin Ózbekstan jáne Tájikstan elderine de benzındi eksporttaý týraly sóz qozǵady. Mınıstrdiń aıtýynsha, qujat jumystary aıaqtalǵan jaǵdaıda naýryz aıynan bastap Ózbekstanǵa jáne Tájikstan, Aýǵanstanǵa benzındi tasymaldaýǵa jol ashylady.

«Sondyqtan, bul máseleni bir eki aıdyń ishinde sheshetin bolamyz degen oıdamyn», - dedi Qanat Bozymbaev.