Qazaqstan altyn-valıýta qoryn satýdan jyl saıyn 5,5-6 mlrd dollar taýyp otyr
ASTANA. KAZINFORM – Ulttyq bank tóraǵasy Tımýr Súleımenov altyn-valıýta rezerviniń aqshasyn ishki naryqqa baǵyttaý týraly sheshimniń mánin túsindirdi.
- Bıyl biz altynmen baılanysty operatsııalar boıynsha monetarlyq beıtaraptyqqa kóshý týraly sheshim qabyldadyq. Baǵaly metaldar týraly zań qabyldanǵan 2011 jyldan bastap Ulttyq bank búkil el aýmaǵynda jalǵyz altyn satyp alýshy bolyp esepteledi. Barlyq altyn óndirýshi kásiporyndar Ulttyq bankke satýǵa mindettelgen. Ulttyq Bank jylyna barlyq altyn óndirýshilerden óndiris kólemine baılanysty 60-70 tonna altyn satyp alady. Ony teńgemen satyp alamyz. Sodan keıin syrtqy naryqqa satyp, sonyń esebinen altyn-valıýta rezervterin tolyqtyramyz. Bul 2014-2015 jyldary bizde qatty kúızeliske ushyraǵan altyn-valıýta rezervterin qalpyna keltirýge múmkindik berdi. Sonymen qatar bıznes te aıaǵyna turýǵa múmkindik aldy. Óıtkeni óndirgen altynyn satyp alatynyna kepildik bar, - dedi Tımýr Súleımenov Bizdiñ Orta podkastynda.
Aıtýynsha, qazir biz rezervti 45 mıllıard dollardan asyrdyq. Olar búkil halyqaralyq kórsetkishterden artyq.
- Bul qıyn kezeńde rezervte qor bolýy úshin kerek. Osy mejege jetkennen keıin biz monetarlyq beıtaraptyqqa kóshemiz dep bekindik. Altyndy syrtqy naryqqa satýdan keletin valıýtany ishki naryqqa usynamyz. Bul ishki naryqqa jyl saıyn qosymsha 5,5-6 mlrd dollar shyǵaryp otyrýǵa múmkindik beredi.
Bizdiń tólem balansy únemi teris bolyp kele jatyr. Osyndaı júıede sheteldik valıýtaǵa suranys usynystan asyp ketse, jańa tásil turaqtandyrýshy áser beredi, - dedi Tımýr Súleımenov.
Aıta keteıik, Ulttyq bank 1,5 mlrd teńgeniń alaıaqtyqqa tán tranzaktsııalaryn buǵattady.