Qazaqstan Altyn Orda tarıhyn álemdik jylnamanyń kúrdeli kezeńi retinde qarastyrady — Prezıdent
ASTANA. KAZINFORM — Álemdik qoǵamdastyq tarıhı jolaıryqta tur. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Qazaqstan Altyn Orda tarıhyn álemdik jylnamanyń kúrdeli, san salaly kezeńi retinde qarastyrady. Óıtkeni buǵan atústi qaraýǵa bolmaıdy. Olaı bolǵan jaǵdaıda álemdik tarıhtaǵy osyndaı biregeı qubylysqa qatysty ustanym ózgeredi. Al ol memleketter men halyqtar arasyndaǵy qarym-qatynasqa syzat túsirýi múmkin. Ókinishke qaraı, álemdik mańyzy bar iri tarıhı oqıǵalardy burmalaǵan mysaldar qazir de kezdesedi. Geosaıası ahýal qubylyp turǵan búgingideı zamanda soǵystardyń qasiretti hronologııasyna baılanyp qalmaı, adamzat tarıhyndaǵy jasampaz kezeńder men dıalog alańdarynyń nátıjeli sátterine mán bergen jón. Álbette, bul ońaı mindet emes, — dedi Prezıdent.
Memleket basshysy tarlan tarıhtyń baǵzy dáýirlerden bastap qazirgi deıingi shejiresinde soǵystar men qarýly qaqtyǵystar óte kóp kezdesetinin aıtty.
— Mundaı kórinistiń qalyptasýy da túsinikti: beıbit kúndegi kúıbeń tirshilikti sıpattaǵannan góri qan maıdandaǵy bitispes urystardy jazǵan áldeqaıda jeńil. Aıtpaqshy, Lev Tolstoıdyń ataqty «Soǵys jáne beıbitshilik» romany — beıbitshilikti emes, soǵysty egjeı-tegjeıli sýrettegen shyǵarma. Álemdik qoǵamdastyq tarıhı jolaıryqta tur. Órkenıetti tańdaý aldyndaǵy syndarly sátte ortaq tarıhymyzdy halyqtardy biriktiretin faktor retinde usyný úshin bedeldi, kásibı ǵalymdardyń kúshin bir arnaǵa toǵystyrǵan durys, — dedi Qasym-Jomart Toqaev.
Aıta ketelik Qasym-Jomart Toqaev tarıh halyqtardyń arasyn jalǵaıtyn altyn kópir degen edi.
