Qazaqstan altyn qoryn kóbeıtti: onyń qandaı tıimdiligi bar
ASTANA. KAZINFORM – Taıaýda World Gold Council uıymy, ıaǵnı Dúnıejúzilik altyn keńesi keıingi aıda Qazaqstannyń altyn qory 7,4 tonnaǵa artqanyn málimdedi. Osylaısha el rezervindegi altynnyń jalpy kólemi 298 tonnadan asqan. Altyn qoryn kóbeıtý ne úshin mańyzdy, Qazaqstan ekonomıkasyna qandaı paıda tıgizbek? Kazinform agenttiginiń analıtıkalyq sholýshysy jaı-kúıdi bildi.
Dúnıejúzilik altyn keńesi álemdik reıtıngte Halyqaralyq valıýta qory men Eýropa ortalyq bankin esepke almaǵanda Qazaqstannyń 18-orynda turǵanyn jazǵan. Elimiz Ulybrıtanııa men Lıvannyń ortasyna jaıǵasqan eken. Al úzdik bestik ózgerissiz qaldy: AQSh, Germanııa, Italııa, Frantsııa jáne Reseı. Birinshi orynda turǵan AQSh-tyń altyn qory bıyl 8,13 myń tonnadan asqan.
Sonymen, eldiń altyn qorynyń artýynan qandaı paıda bar? Qarjyger Ǵımran Abdrahmanovtyń aıtýynsha, altyn qory memlekettiń ekonomıkasynda qaýipsizdik tetigi sekildi ról atqarady. Tipti, ınflıatsııany tómendetýge de qatysy bar.
– Altyn qorynyń artýy, eń aldymen eldiń turaqtylyǵy men qarjylyq qaýipsizdigin qamtamasyz etý úshin jasalady. Ol ınflıatsııany tómendetý men ekonomıkalyq qaýipterge qarsy «qaýipsizdik jastyǵy» ispetti dúnıe, ıaǵnı altyn ekonomıkanyń qubylmaly kezeńderinde eń senimdi aktıv bolyp qala beredi.
Eýro men dollar valıýtasy turaqty sanalǵanymen, altyn barlyq kezeńde senimdi jáne qaýipsiz qural sanalady. Sebebi ekonomıkanyń tsıkldik sıpaty kezinde kompanııa aktsııalary, valıýtalar jáne basqa aktıvter qubylyp turady. Tipti, ózimizdiń teńgemizdiń de turaqsyz ekenin kórip otyrmyz. Sol sebepti, altyn rezervin júıeli túrde tolyqtyryp otyrý – eń durys ári tıimdi qadam, – deıdi sarapshy.
Qazir Comex bırjasynda altynnyń troııa ýntsııasy 3,2-3,36 myń dollar aralyǵynda saýdalanýda. Al Ulttyq bank saıtynda 1 gramm altynnyń baǵasy ár kúni 54-56 myń teńgege baǵalanyp júr.
Ónerkásip jáne qurylys mınıstrligi elimizdiń paıdaly qazbalarmen qamtamasyz etilý merzimine qatysty jańartylǵan derekterdi jarııalady. Sońǵy derekterge sáıkes, qazirgi óndirý kólemin eskersek, elimizdegi altyn qory 30 jylǵa jetedi.