Qazaqstan Almatyda dzıýdodan gran-prıde medaldar esebi boıynsha tórtinshi oryn aldy
ASTANA. QazAqparat - Almatyda dzıýdodan gran-prı saıysy aıaqtaldy, dep habarlady dzıýdo federatsııasy.
Jarys qorytyndylarymen Qazaqstan medaldar esebinde tórtinshi oryn aldy. Bizdiń quramanyń qorjynynda 1 altyn, 3 kúmis jáne 1 qola medal bar.
Sońǵy kúni 15 mamyrda tatamıde erler 90 kelige deıingi, 100 jáne 100+ salmaq sanattarynda aıqasty, sondaı-aq qyzdar da 78 kelige deıingi jáne 78+ keli salmaq sanattarynda synǵa tústi. 90 kelige deıingi salmaq sanatynda fınaldyq oıyndarǵa Dáýlethan Jaqypov jetti. Ol qola medal úshin talasty, alaıda slovak Zgank Mıhaeldi jeńe almaı, besinshi oryndy qanaǵat tutty.
Qyzdar arasynda 78 kelige deıingi salmaq sanatynda qazaqstandyq dzıýdoshy Albına Amangelıeva Aspanasty eliniń sportshysy Jang Jehýıge jol berip, kúmis medalǵa ıe boldy.
Jarystyń alǵashqy kúni erler 60-qa deıingi jáne 66 keli salmaqtarda, al qyzdar 48, 52, 57 keli salmaq sanattarynda saıysty.
Erler arasynda 60 kelige deıingi qazaqstandyq dzıýdoshy Rýstam Ybyraev fınalǵa shyqty, biraq ta ıtalıandyq Elıosty jeńe almaı, ekinshi orynǵa ıe boldy. Ókinishke qaraı, bizdiń sportshylarymyz Ashat Telmanov pen Aıbek Imashev te ózbek sportshylarmen aıqasta qola medalǵa qol jetkize almady. Olar besinshi orynmen ǵana shekteldi. Osy salmaq sanatynda taǵy bir sportshymyz Qylysh Erenǵaıypov jaqsy oıyn órnegin kórsetkenimen, jetinshi oryndy mise tutty.
66 kelige deıingi salmaqta qazaqstandyq dzıýdoshy Jansaı Smaǵulov japondyq Marýıamı Joshırodan aılasyn asyra almaı, kúmis medaldi ıelendi. Eldos Jumaqanov úshinshi orynǵa ıe bolyp, ıtalıandyq Basıle Fabıodan basym tústi.
Qyzdar arasynan birden-bir «altynǵa» Galbadrah Otgontsetseg jeńip aldy. Fınaldyq aıqasta ol Koreıa sportshysy Jeong Bo Keengti jeńip ketti.
Gran-prıdiń ekinshi kúni erler 73 kelige deıingi jáne 81 kelilik salmaqta , al qyzdar 63 kelige deıingi, 70 kelilik salmaqta kúsh synasty. Fınalǵa 73 kelige deıingi Dıdar Hamza ǵana jetti. Ol qola medal úshin mońǵol dzıýdoshysy Sanjargal Nıam-Ochırmen aıqasyp, sońǵy sekýndtarda jeńiske jetti. Sanjargal Nıam-Ochır álem chempıonatynyń jáne Olımpıadalyq oıyndardyń qola júldegeri ekenin atap ótken jón.
Ókinishke qaraı, bizdiń qyzdarymyz 63 kelige deıingi jáne 70 kelilik salmaq sanattarynda jeńiske jete almady.
Almatydaǵy gran-prıge álemniń 83 elinen 400 sportshy qatysty.
