Qazaqstan Almaty — Qorǵas tas jolyna qatysty halyqaralyq sotty jeńdi
ASTANA. KAZINFORM — Qazaqstan Parıjde Almaty-Qorǵas tas jolyna qatysty 50 mıllıon dollarlyq sot isin jeńdi. Bul týraly Ádilet mınıstrliginiń baspasóz qyzmeti málim etti.
— 14 sáýirde Parıjdegi ICC Halyqaralyq tórelik sotynda qurylǵan Trıbýnal QR Indýstrııa jáne ınfraqurylymdyq damý mınıstrliginiń Avtomobıl joldary komıtetiniń paıdasyna túpkilikti sheshim shyǵardy. Talapkerlerdiń barlyq talaptary tolyǵymen qabyldanbady. Trıbýnal Komıtettiń qarsy talabyn qanaǵattandyryp, Talapkerlerge jumys merzimin uzartqany úshin ótemaqy retinde buryn tólengen somany qaıtarýǵa mindettedi. Sondaı-aq, Trıbýnal Komıtet jeńiske jetken tarap retinde ózinin sot jáne tórelik shyǵyndaryn tolyq óteýge quqyly ekenin moıyndady, — delingen habarlamada.
2020 jylǵy 15 mamyrdaǵy «Todini Impregilo Kazakhdorstroy» birlesken kásiporyn sheńberinde jumys isteıtin Todini Costruzioni Generali S.p.A., WeBuild S.p.A. jáne «Kazahdorstroı» JShS kompanııalarynan turatyn birlesken kásiporyn Halyqaralyq saýda palatasy (ICC) janyndaǵy Halyqaralyq tórelik sotqa Qazaqstan Respýblıkasynda Almaty — Horgos avtojolyn salý jobasy boıynsha shyqqan daýǵa baılanysty Qazaqstan Respýblıkasy Indýstrııa jáne ınfraqurylymdyq damý mınıstrliginiń Avtomobıl joldary komıtetine qarsy tórelik týraly ótinish bergeni belgili bolyp otyr.
Іsti qaraý sheńberinde Talapker Komıtetke qurylys merzimderin uzartýǵa, kedendik bajdar men salyqtardy tóleýge, teńgeniń ınflıatsııasyna, qunynyń ózgerýine, sý ótkizgish trýbalardy qaıta toltyrýǵa, jol paıdalaný pýnktiniń qurylysyn toqtatýǵa jáne qarjylyq shyǵyndarǵa baılanysty jalpy somasy shamamen 50 mıllıon AQSh dollary kóleminde shaǵym túsirgen.
Osy isti Komıtettiń ókildigi men múddelerin qorǵaýdy Qazaqstan Respýblıkasynyń Ádilet mınıstrligi júzege asyrǵan. Konsýltant retinde Curtis, Mallet-Prevost, Colt & Mosle LLP halyqaralyq zań fırmasy tartyldy.
Eske sala keteıik, buǵan deıin Ádilet mınıstrligi «Tsıfrlyq atqarýshylyq jazba» pılottyq jobasyn iske qosqan edi.