Qazaqstan alǵashqy eki AES-ti nege Reseı men Qytaı kompanııalaryna tapsyrdy — agenttik jaýaby

ASTANA. KAZINFORM — Atom energetıkasy jónindegi agenttik Kazinform saýalyna joldaǵan jaýapta Qazaqstan alǵashqy eki AES-ti nege Reseı men Qytaı kompanııasyna tapsyryp otyrǵanyn túsindirdi. 

— Tehnıkalyq sıpattamalaryna kelsek, barlyq reaktordyń jobalyq qyzmet etý merzimi — 60 jyl. Alaıda koreıalyq APR1000 jáne frantsýzdyq EPR1200 reaktorlarynyń naqty paıdalanylý tájirıbesi joq. Bul turǵyda reseılik VVER-1200, qytaılyq HPR1000 jáne koreıalyq APR1400 tehnologııalarynyń naqty tájirıbesi bar.

Reseı, Qytaı jáne Frantsııa ıadrolyq otyn tsıklynyń barlyq kezeńine qatysady, al Koreıa bul salaǵa tolyqqandy qatyspaıdy. Sonymen birge, Reseı men Qytaı ıadrolyq otyn tsıklynyń jekelegen elementterin Qazaqstanda shoǵyrlandyrý múmkindigin qarastyrýǵa daıyn, — dep jazady agenttik sarapshylary.

Agenttik Reseı men Qytaı óz aýmaǵynan bólek basqa memleketterde de 20-dan astam reaktor salyp jatqanyn alǵa tartyp otyr.

— Al Frantsııa men Koreıa qazir tek eki reaktordan salyp jatyr: Koreıada — APR1400, Chehııada — APR1000, Ulybrıtanııada — EPR1600 tehnologııasy boıynsha.

Budan bólek, Reseı men Qytaıda halyqaralyq konsortsıýmdar jumysyna keń kólemde qatysý tájirıbesi bar. Olar túrli óndirýshilerdiń jabdyqtaryn bir joba aıasynda tıimdi túrde biriktire alady.

Jalpy, qazir tek Reseı men Qytaı ǵana qarjylandyrýdan bastap, ıadrolyq-otyn tsıklin qaıta bólýdi oqshaýlaýǵa, kadrlardy daıarlaýǵa, paıdalanylǵan ıadrolyq otyndy jobalaýǵa, salýǵa jáne óńdeýge deıingi qyzmetterdiń tolyq keshenin derbes usyna alady, — delingen agenttik jaýabynda.

Eske salsaq, buǵan deıin Qazaqstan ekinshi AES salatyn konsortsıýmnyń tizginin Qytaıǵa berýge nıetti ekenin málim bolǵan edi.