Qazaqstan alǵash ret Londondaǵy kitap jármeńkesine qatysty
ASTANA. QazAqparat - Londondyq kitap jármeńkesi aıasynda «Rýhanı jańǵyrý» baǵdarlamasynyń tanystyrylymy jáne qazaq ádebıetiniń klassıkteri Oralhan Bókeev jáne Gerold Belger, Áýezov shyǵarmalarynyń tusaýkeser rásimi ótti, dep habarlaıdy Habar 24.
Aıta ketý kerek, qazaqstandyq tarap mundaı iri sharaǵa alǵash ret qatysyp otyr.
«Baspa qaýymdastyǵynyń basty jıynyna aınalǵan londondyq jármeńke 47 jyl boıy álemdik kitap naryǵynyń qatysýshylaryn jınap keledi. Bul joly olar iskerlik baılanystar ornatyp, aqparat almasady. Kitap isiniń sheberi atanǵan 23 myń mamannyń qataryna bıyl qazaqstandyqtar da qosyldy», - dedi tilshi Ǵalymjan Qaramanuly.
«Rýhanı jańǵyrý» memlekettik baǵdarlamasynyń tanystyrylymy kezinde latyn grafıkasyna kóshý, «Týǵan jer», «Qazaqstannyń kıeli jerleriniń geografııasy», «Álemdegi zamanaýı qazaqstandyq mádenıet» jáne «Qazaqstandaǵy 100 jańa esim» atty iri jobalar týraly keńinen baıandaldy.
Kitap jármeńkesi kezinde qazaq ádebıetiniń klassıkteri Oralhan Bókeevtiń «Kisi kıik» jáne Gerold Belgerdiń «Tańdamaly shyǵarmalarynyń», Áýezovtiń «Qaraly sulý jáne basqa da áńgimeleriniń» tusaýkeseri de ótti. Olardyń barlyǵyn aǵylshyn tiline Qazaq PEN-klýbynyń yqpal etýimen brıtandyq aýdarmashylar Saımon Hollıngsvort pen Saımon Geıgan aýdaryp shyqty.
«Biz qazaqshadan emes, orys tilinen aýdardyq. Biraq oryssha aýdarmasyn Áýezovpen qoıan-qoltyq jumys istegen onyń jaqyn dosy Andreı Panteleev jasaǵan. Sondyqtan bul túpnusqaǵa óte jaqyn», - dedi aýdarmashy Saımon Geıgan.
Іs-shara brıtanııalyq oqyrmannyń zor qyzyǵýshylyǵyn týǵyzdy. Oǵan belgili baspa úıleriniń jetekshileri, British Council ókilderi men jergilikti jýrnalıster qatysty.
«Bul kezdesýge kelmes buryn maǵan Muhtar Áýezovti aǵylshyn tilinde oqý baqyty buıyrdy. Menińshe, bul óte keremet eńbek. Jáne men úshin búgin osynda kelip, avtorlar jaıly kóbirek bilý úlken qýanysh. Endi olardyń basqa da eńbekterin oqımyn», -dedi VVS telearnasynyń tilshisi Robert Grınal.
Qazaqstan London jármeńkesine tuńǵysh ret qatysyp otyr. Ulttyq stendke «Mektep», Ulttyq aýdarma bıýrosy jáne «Almaty Kitap» baspalarynyń ónimderi qoıyldy.
«Jalpy alǵanda Qazaqstanǵa degen qyzyǵýshylyqtyń bar ekenin ańǵarýǵa bolady. Halyq kelip, suraqtar qoıyp jatyr. Árıne mundaı múmkindiktiń paıda bolǵanyna óte rızamyz. Qazaqstannyń Ulybrıtanııadaǵy elshiligine úlken rahmet», - dep túıindedi sózin «Almaty Kitap» baspasynyń kommertsııalyq dırektory Olesıa Jır.
Dál osy kúni londondyq oqyrman nazaryna «Rýhanı jańǵyrý» baǵdarlamasynyń mańyzdy bóligi sanalatyn «Jańa gýmanıtarlyq bilim. Qazaq tilindegi 100 jańa oqýlyq» atty jobasy usynyldy. Qazaqshaǵa aýdarylǵan oqýlyqtardyń qatarynda brıtanııalyq avtorlardyń da eńbekteri bar.
