Qazaqstan alǵash ret IKAO-nyń Avıatsııalyq qaýipsizdik aptalyǵyn ótkizedi
ASTANA. KAZINFORM — 2026 jylǵy 20–22 qazanda Astana qalasynda Kólik mınıstrliginiń qoldaýymen IKAO-nyń Avıatsııalyq qaýipsizdik aptalyǵy ótedi, dep habarlaıdy Kólik mınıstrliginiń baspasóz qyzmeti.
Bul is-shara — avıatsııalyq qaýipsizdik pen kıberqaýipsizdik salasyndaǵy negizgi halyqaralyq is-sharalardyń biri. Qazaqstan alǵash ret álemniń túkpir-túkpirinen memleketterdiń avıatsııalyq bılik organdary men avıatsııa salasynyń ókilderi jınalatyn jahandyq forýmdy ótkizý alańyna aınalady.
Qazaqstan avıatsııalyq qaýipsizdik kórsetkishi boıynsha (95,7%) álemniń TOP-20 eli qataryna kiredi jáne qazirgi ýaqytta osy kórsetkish boıynsha Ortalyq Azııa óńirinde kósh bastap tur.
— IKAO-nyń Qaýipsizdik aptalyǵyna qatysý úshin IKAO Bas hatshysy Hýan Karlos Salasar Qazaqstanǵa alǵash ret resmı saparmen keledi. Іs-sharaǵa sondaı-aq Brazılııa, Majarstan, Italııa, Kanada, BAÁ, Portýgalııa, AQSh, Taıland, Frantsııa, Efıopııa jáne basqa da memleketterdiń joǵary laýazymdy ókilderi, sondaı-aq BUU, AFCAC, LACAC, IATA, ECAC jáne GEA sııaqty iri halyqaralyq uıymdardyń ókilderi qatysady, — delingen habarlamada.
IKAO-nyń 2026 jylǵy Qaýipsizdik aptalyǵy aıasynda qatysýshylar tsıfrlyq tehnologııalar men jasandy ıntellektiniń damýyna, kıberqaýipterdiń ósýine, ushqyshsyz áýe kemeleriniń taralýyna, sondaı-aq qarýly qaqtyǵystar men geosaıası turaqsyzdyqtyń saldaryna baılanysty táýekelderdi basqarýdyń zamanaýı tásilderin talqylaıdy. Innovatsııalar men jańa tehnologııalar, kadrlardy damytý jáne avıatsııalyq qaýipsizdik júıelerin nyǵaıtý máselelerine erekshe nazar aýdarylady.
Qaýipsizdik aptalyǵy barysynda Astana avıatsııalyq qaýipsizdiktiń ózekti máseleleri boıynsha halyqaralyq dıalog alańyna aınalady. Іs-sharanyń aýqymy men oǵan qatysatyn ókilderdiń joǵary deńgeıi onyń álemdik avıatsııa salasy úshin aıryqsha mańyzǵa ıe ekenin kórsetedi. Sonymen qatar, bul Qazaqstannyń jahandyq avıatsııa qoǵamdastyǵynyń belsendi qatysýshysy retindegi halyqaralyq bedelin nyǵaıtyp, azamattyq avıatsııa qaýipsizdigin qamtamasyz etýdiń bolashaqtaǵy tásilderin qalyptastyrýǵa qosatyn úlesin arttyrady.
Avıatsııalyq qaýipsizdik aptalyǵy (Aviation Security Week) 2001 jyldan bastap ótkizilip keledi. Bul bastama IKAO-nyń qoldaýymen jahandyq deńgeıde jáne AQSh, Kanada, Avstralııa, Úndistan, Afrıka elderi, Oman jáne basqa da memleketterde ulttyq deńgeıde júzege asyrylady.
Buǵan deıin Qazaqstan avıatsııalyq oqıǵalardy tergeý salasynda IKAO tájirıbesin engizetinin jazǵanbyz.
