Qazaqstan alǵash ret Germanııanyń iri týrıstik forýmyn qabyldady
ASTANA. KAZINFORM – Astanada alǵash ret Germanııanyń týrıstik ındýstrııasyndaǵy mańyzdy sharalardyń biri – DRV Destination Forum 2026 ótti.
Forýmǵa Germanııanyń jetekshi týroperatorlary, týrıstik agenttikteri, salalyq qaýymdastyqtary men mamandandyrylǵan BAQ ókilderin qosa alǵanda, 130-ǵa jýyq adam qatysty. Onyń 69-y Germanııadan kelgen delegattar.
Іs-sharanyń ashylý rásimine Týrızm jáne sport vıtse-mınıstri Mıras Tólebaev qatysty.
– Germanııa Qazaqstan úshin strategııalyq mańyzy bar negizgi týrıstik naryqtardyń biri. Biz týrıstik aǵynnyń turaqty ósimin baıqap otyrmyz jáne nemis týrıstik bıznesimen praktıkalyq yntymaqtastyqty odan ári keńeıtýge múddelimiz. Bizdiń maqsatymyz – Qazaqstandy jalpy ilgeriletýden naqty týrıstik ónimderdi birlesip ázirleý men naryqqa shyǵarýǵa, B2B baılanystardy damytýǵa jáne eki el kompanııalary arasynda uzaq merzimdi seriktestik ornatýǵa kóshý, – dedi Mıras Tólebaev.
Forým Kazakh Tourism UK AQ men Germanııanyń Deutscher Reiseverband (DRV) týrıstik qaýymdastyǵy arasyndaǵy júıeli yntymaqtastyqtyń nátıjesinde uıymdastyryldy. 2025 jyly DRV ókilderi Qazaqstanǵa tehnıkalyq saparmen kelip, eldiń týrıstik áleýetimen tanysqan. Al bıyl naýryzda ITB Berlin kórmesi aıasynda DRV men QR Týrızm jáne sport mınıstrligi arasynda yntymaqtastyq týraly memorandýmǵa qol qoıylyp, forýmdy Astanada ótkizý jóninde kelisim jasaldy.
Forým qarsańynda, 20-24 tamyz kúnderi Germanııa delegatsııasy Qazaqstannyń birneshe óńirine saparlady. Qonaqtar Almaty jáne Shymkent qalalarynyń, Almaty, Mańǵystaý, Shyǵys Qazaqstan jáne Túrkistan oblystarynyń týrıstik nysandaryn aralap, óńirlerdiń ınfraqurylymy men týrıstik ónimderimen tanysty.
Forýmnyń iskerlik baǵdarlamasynda qazaqstandyq týrıstik kompanııalar men nemis týroperatorlary arasyndaǵy B2B kezdesýlerge erekshe kóńil bólindi. DRV baǵalaýynsha, mundaı tikeleı iskerlik baılanystar kelesi jyldyń ózinde Qazaqstanǵa keletin nemis týrısteriniń sanyn 25%-ǵa arttyrýǵa múmkindik berýi múmkin.
Týrızm jáne sport mınıstrligi málimetinshe, búginde Germanııadan Qazaqstanǵa jyl saıyn shamamen 100 myń týrıst keledi. Olardyń úshten birinen astamy elde birneshe kún aıaldaıtyn saparlardy júzege asyrady.
Aıta keteıik, DRV Germanııanyń týrıstik ındýstrııasyndaǵy 3 myńnan astam kompanııany biriktiredi. Olar Germanııa azamattarynyń uıymdastyrylǵan týrıstik saparlarynyń shamamen 90%-yn qamtamasyz etedi.
DRV Destination Forum 2026-nyń Astanada alǵash ret ótkizilýi Qazaqstannyń týrıstik áleýetin Germanııa naryǵynda keńinen tanytýǵa jáne eki eldiń týrıstik bıznesi arasyndaǵy tikeleı seriktestikti damytýǵa múmkindik beredi.
Qýańshylyq pen aptap ystyq Germanııa fermerlerin jem-shóp tapshylyǵyna ushyratqanyn jazǵan edik.
