Qazaqstan alǵash ret Azııa-Tynyq muhıty aımaǵyndaǵy úzdik mekemelerdiń bedeldi reıtıngine endi

ASTANA. KAZIFORM - Birden 3 qazaqstandyq mekeme «ASIA-PACIFIC-Best 100 & best - in-Class» reıtınginiń top-100 kirdi. Tatler Best alǵash ret elimizdi úzdik toptamaǵa qosyp, gastronomııa men qonaqjaılylyq ındýstrııasynyń deńgeıiniń joǵary ekenin atap ótti.

Kazakh Tourism kompanııasynyń habarlaýynsha, Bangkokte Tatler Best 2025 baıqaýynyń nátıjeleri jarııalandy. Qazaqstannan Azııa-Tynyq muhıty aımaǵyndaǵy TOP-100 qonaq úı, meıramhana men bar reıtıngisine elordalyq «The Veil» býtık-qonaqúıi, Almaty qalasyndaǵy «Auyl» meıramhanasy jáne «French 42» kirdi. Olar salanyń jetekshi álemdik ókilderimen qatar úzdik dep tanyldy.

-Qazaqstan halyqaralyq arenada óz pozıtsııasyn nyǵaıtyp, qonaqjaılylyqtyń ózindik stılin damytýda. Halyqaralyq moıyndaý – bul otandyq qonaqjaılylyq jáne gastronomııa ındýstrııasy ókilderiniń maqsatty jumysynyń nátıjesi. Olar zamanaýı standarttar men ulttyq biregeılikti sátti ushtastyryp otyr-, – dep atap ótti «Kazakh Tourism» ulttyq kompanııasy» AQ basqarma tóraǵasynyń mindetin atqarýshy Danıel Serjanuly.

Tatler Best syılyǵynyń laýreattaryn irikteý birneshe kezeńnen turady. Oǵan búkil aımaqtan qonaqjaılylyq salasynyń 700-den astam sarapshysy qatysady. Qazylar quramynda Tatler redaktsııalyq toptary, tanymal aspazdyq synshylar, halyqaralyq jýrnalıster jáne salanyń kásibı mamandary bar. Baǵalaý barysynda gastronomııa boıynsha álemdegi yqpaldy sarapshylardyń pikiri eskeriledi.

Atap ótken jón, bıyl eki qazaqstandyq mekeme bedeldi «The World’s 50 Best» jahandyq reıtınginiń «50 Best Discovery» tizimine endi.

Osyǵan deıin Qazaqstannyń medıtsınalyq týrızmdi damytatyny týraly jazdyq.