Qazaqstan alǵash qatysqan Dúnıejúzilik gımnazııada sátti ótti - Toǵjanov

Atalǵan is-sharaǵa ortalyq jáne jergilikti memlekettik organdardyń ókilderi, elimizdiń kórnekti sport sheberleri men mektep oqýshylary qatysty.
«Qazaqstan Respýblıkasy Dúnıejúzilik gımnazııadaǵa alǵash ret qatysýda. Soǵan qaramastan debıýt sátti ótti», — dedi vıtse-premer.
Onyń aıtýynsha, mundaı jetistikke Memleket basshysynyń balalar men jasóspirimder sportyn damytý baǵytyndaǵy júıeli sharalardy iske asyrýdaǵy qoldaýy óz septigin tıgizdi.
Jarysqa Qazaqstannan 234 oqýshy qatysty. Bizdiń qurama 70 elden kelgen komandalar arasynan júldeli úshinshi orynǵa ıe boldy. Jas sportshylar 86 medalǵa ıe boldy, onyń ishinde 33 altyn, 32 kúmis jáne 21 qola medal bar. Qazaqstandyq qurama sporttyń 13 túri boıynsha júldeli oryndarǵa ıe boldy.
«Gımnazııadada kórsetken joǵary kórsetkishter elde sportty damytýdaǵy atqarylyp jatqan birqatar jumystardyń náıjesi», — dedi E. Toǵjanov.
Búgingi tańda elimizde 480-nen astam balalar men jasóspirimder sport mektebi qyzmet kórsetedi, onda 386 myń sportshy shuǵyldanady. Balalar klýbtary da belsendi damyp keledi. Qazirdiń ózinde 138 klýb ashyldy. Aýyldarda sport nusqaýshylarymen qamtamasyz etý máseleleri sheshilýde.
Bıyl joǵary bilikti mamandar 1 833 aýylǵa jiberildi. 2025 jylǵa deıin sport nusqaýshylary bar aýyldar sany 3,5 myńǵa deıin artady. Mektepterde 49 myńnan astam sport sektsııalary jumys isteıdi. Sondaı-aq Ulttyq mektep lıgasy ótkizilip, onda qatysýshylar sporttyń 10 túrinen baq synaýda. Jaqynda Qazaqstan oqýshylary arasynda qysqy jáne jazǵy gımnazııadalar ótkizile bastady.
Premer-Mınıstrdiń orynbasary qatysýshylardyń ata-analaryna balalardyń laıyqty tárbıesi úshin alǵys aıtty. Sondaı-aq jattyqtyrýshylar men muǵalimderdiń, jeńimpazdarǵa chempıondyq rýh uıalatqan sport jáne basqa da mektepter ujymynyń mańyzdy rólin atap ótti. Jas sportshylarǵa bolashaqta álemdik arenalarda kók týymyzdy jelbiretip, Olımpıada oıyndarynda elimizdiń atyn asqaqtata berýge tilektestik bildirdi.
Іs-shara sońynda E. Toǵjanov 2024 jyly mereıtoılyq XX Dúnıejúzilik gımnazııada Bahreınde ótetinin aıtyp, mektep oqýshylaryn daıarlaý úshin Úkimet tarapynan tolyq qoldaý kórsetiletinin atap ótti.