Qazaqstan áleýmettik kómek júıesin jetildirý úshin bes eldiń tájirıbesin zerttedi
ASTANA. KAZINFORM – Qazaqstanda ataýly áleýmettik kómek kórsetý tetigin jetildirý úshin birqatar memlekettiń tájirıbesi zerdelendi. Bul týraly Eńbek jáne halyqty áleýmettik qorǵaý mınıstrligi Kazinform agenttiginiń saýalyna bergen jaýabynda málimdedi.
Mınıstrliktiń habarlaýynsha, sheteldik tájirıbeni zertteý barysynda otbasylardyń áleýmettik jaǵdaıyn keshendi baǵalaý tásilderine erekshe nazar aýdarylǵan.
– Atap aıtqanda, Italııa, Germanııa, Kanada, Aýstralııa jáne Fınlıandııanyń tájirıbelerin zerttedik. Munda otbasynyń tabysy ǵana emes, kúndelikti shyǵystary men múliktik jaǵdaıyn birge qarastyrý máseleleri zerdelengen. Sonymen qatar áleýmettik kómek kórsetý júıesin jumyspen qamtý sharalarymen ushtastyrý tájirıbesine de kóńil bólindi, - delingen vedomstvo jaýabynda.
Bul tásilder áleýmettik qoldaýǵa muqtaj azamattardyń jaǵdaıyn jan-jaqty baǵalaý máselelerin qamtıdy.
Mınıstrlik atalǵan bes memlekettiń tájirıbesi ataýly áleýmettik kómek kórsetý tetigin jetildirý aıasynda zerttelgenin habarlady.
Aıta keteıik, Al 2026 jylǵy 1 qazandaǵy jaǵdaı boıynsha 41 252 otbasyndaǵy 222 312 adamǵa ataýly áleýmettik kómek taǵaıyndaldy.
