Qazaqstan álemniń 15 elimen áskerı-tehnıkalyq yntymaqtastyq týraly kelisim jasaǵan
ASTANA. KAZINFORM — Qazaqstan álemniń 15 elimen áskerı-tehnıkalyq yntymaqtastyq týraly kelisim jasaǵan. Bul týraly Quryltaı otyrysynda Qorǵanys mınıstriniń orynbasary Shaıh-Hasan Jazyqbaev aıtty.
Búgin Quryltaı otyrysynda depýtat Serik Egizbaev mınıstr orynbasarynan: «Qazaqstan syrtqy saıasatta kópvektorlyqty ustana otyryp, túrli memlekettermen áskerı yntymaqtastyqty damytady. Osy oraıda qazir qaralyp jatqan Serbııa memleketimen yntymaqtastyqtyń áskerı-tehnıkalyq saladaǵy basqa seriktes eldermen ózara is-qımyl jasaýdyń qoldanystaǵy tetikterinen ereksheligi nede?», — dep suraǵan edi.
Saýalǵa jaýap bergen mınıstr orynbasary búgingi tańda elimizde 15-ten astam basqa shet memlekettermen osyndaı áskerı yntymaqtastyq jónindegi kelisimsharttar bar ekenin aıtty.
— Búgingi usynylyp otyrǵan zań jobasyndaǵy Serbııa memleketimen áskerı-tehnıkalyq yntymaqtastyq osyǵan deıingi bolǵan kelisimsharttardan ózgesheligi joq. Ótkizý, is-qımyl solarmen birdeı bolady jáne ishki zańnamamyzǵa, elimizge eshqandaı nuqsan keltirmeıdi, — dedi Shaıh-Hasan Jazyqbaev.
Buǵan deıin «Qazaqstan men Serbııa Úkimetteri arasyndaǵy áskerı-tehnıkalyq yntymaqtastyq týraly kelisimdi ratıfıkatsııalaý týraly» zań jobasy birinshi oqylymda maquldanǵanyn jazǵan edik.
