Qazaqstan álemniń úzdik medıtsınalyq JOO-laryn strategııalyq áriptestikke shaqyrady
Joǵaryda atalǵan forýmǵa 300-den astam adam qatysty. Olardyń qatarynda EYDU qatysýshy elderi men damýshy elderdiń densaýlyq saqtaý mınıstrleri men joǵarǵy deńgeıli ókilderi, belgili akademıkter men saýda odaqtarynyń ókilderi boldy, dep habarlaıdy DSÁDM baspasóz qyzmeti.
Alekseı Tsoı EYDU Densaýlyq saqtaý salasy boıynsha komıteti otyrysynyń aıasynda ótken sessııada «Densaýlyq saqtaý salasyndaǵy mamandardyń rolin reformalaý» atty baıandamasynda qazirgi tańda densaýlyq saqtaý júıesinde arnaıy eńbek naryǵyn qurýǵa, onyń ishinde kadrlyq resýrstardy toltyrýdyń sapaly boljamyn jasaýǵa, orta jáne joǵarǵy medıtsınalyq bilimi bar mamandardy daıarlaý máselelerin qaıta qarastyrýǵa, kásibı bilimniń sapasyna qoıylatyn talapty arttyrý qajettiligi bar ekenin atap aıtty.
«Eńbek naryǵy men adam resýrstaryn damytý boljamy men baqylaýyn tıimdi júrgizý, Qazaqstanda densaýlyq saqtaý salasyndaǵy kadrlardy daıarlaýdy josparlaý men basqarýdyń zamanaýı tásilderin engizý maqsatynda densaýlyq saqtaý salasy kadrlyq resýrtaryn josparlaý men boljaýdyń tıimdi ádisterin engizý men ony ázirleýmen aınalysatyn Kadrlyq resýrstar observatorııasy quryldy», - dep habarlady Alekseı Tsoı.
Sonymen birge, vıtse-mınıstr densaýlyq saqtaý salasy kadrlyq áleýetin jetildirýge S.D. Asfendııarov atyndaǵy Qazaq Ulttyq medıtsınalyq ýnıversıtetinde ashylǵan Dúnıejúzilik densaýlyq saqtaý uıymynyń alǵashqy medıtsınalyq-sanıtarlyq kómek boıynsha (ári qaraı - MSAK) geografııalyq shalǵaıdaǵy keńsesi de yqpal etetinin atap aıtty.
«DDSU MSAK boıynsha geografııalyq shalǵaıdaǵy keńsesi 53 DDSU qatysýshy-memleketterdi úılestiretin Eýropalyq aımaq pen Ortalyq Azııadaǵy BUU-nyń alǵashqy iri keńsesi bolyp tabylady. Onyń ashylýy jergilikti kadrlardy, sonymen qatar, DDSU barlyq Eýropalyq aımaq mamandaryn oqytýǵa, halyqaralyq sanattaǵy sarapshylardy shaqyra otyryp MSAK kadrlaryn qaıta daıarlaý men daıyndaýdy jaqsartýǵa múmkindik beretin bolady», - dedi ol.
Sonymen birge, densaýlyq saqtaý júıesi kadrlyq áleýetin tıimdi paıdalaný men ony baqylaý maqsatynda barsha kásibı belsendi mamandardy qamtıtyn Densaýlyq saqtaý salasy kadrlyq resýrstarynyń kásibı regıstri qurylýda. Halyqtyń suranysyna saı joǵarǵy sapaly, qoljetimdi qyzmetterdi kórsete almaý qaýpin tómendetýge, kadrlyq resýrstardy basqarý tıimdiligin arttyrýǵa negizdelgen Densaýlyq saqtaý salasy kadrlyq resýrstaryn basqarýdyń ulttyq korporatıvtik saıasaty ázirlendi.
«Jańa sharttar kadrlardy daıarlaý júıesin jetildirýdi talap etedi. Sondyqtan, Qazaqstan elimizdegi medıtsınalyq JOO úshin álemniń úzdik 500 JOO qataryna kiretin AQSh, Italııa, Shvetsııa, Polsha ýnıversıtetterin strategııalyq áriptester retinde shaqyrady», - dep málimdedi Alekseı Tsoı.
Vıtse-mınıstr sheteldik áriptesterine Qazaqstanda negizgi áleýmettik máni bar, eldiń demografııalyq ahýalyna aıtarlyqtaı áseri bar 5 negizgi nozologııa (mıokardtyń jiti ınfarkti, mıdaǵy qan aınalymynyń aýyr aýytqýlary (ınsýlt), qaterli isik aýrýlary, synyqtar, júktilik jáne bosandyrý) boıynsha medıtsınalyq kómek kórsetýdiń biriktirilgen úlgisi kezeń kezeńimen engizilip jatqanyn habarlady.
Elektrondyq densaýlyq saqtaý júıesiniń halyqaralyq jáne qazaqstandyq birqatar standarttarynyń negizinde Densaýlyq saqtaý salasyn aqparattandyrý men ınteroperabeldik platformasy engizilmek. Ol respýblıkanyń barsha azamattarynyń elektrondy densaýlyq pasportyn, densaýlyq saqtaý salasy qyzmetkeri men patsıenttiń jeke kabınetin, densaýlyq saqtaý salasy biregeı málimetter qoryn engizýge múmkindik beredi.