Qazaqstan álemge jańa qyrynan tanylady – Games of the Future
ASTANA. KAZINFORM – Bıyl elordada ótip jatqan Games of the Future oıyndaryn uıymdastyrý ońaı bolǵan joq. Óıtkeni mundaı jarysta tek sportshylar ǵana emes, tóreshiler, halyqaralyq uıymdar, BAQ ókilderi, memlekettik mekemeler men júzdegen maman birlesip jumys isteıdi. Bul týraly Phygital International kompanııasynyń bas dırektory Den Merklı Kazinform tilshisine bergen suhbatynda aıtty.
Onyń sózinshe, bıylǵy oıyndarǵa álemniń 50-den astam elinen 800-den asa qatysýshy keledi. 12 kún boıy ótetin jarys kezinde sporttyq jarystar ǵana emes, halyqaralyq translıatsııalar, jankúıerlerge arnalǵan túrli sharalar men iskerlik kezdesýler uıymdastyrylady.
– Mundaı aýqymdy jarysty bir uıymnyń kúshimen ótkizý múmkin emes. Sondyqtan biz Astana ákimdigimen, Týrızm jáne sport mınıstrligimen, uıymdastyrý komıtetimen jáne júzdegen mamanmen birlesip jumys istedik. Barlyǵymyzdyń maqsatymyz bir boldy – Games of the Future oıyndaryn joǵary deńgeıde ótkizý. Osyndaı yntymaqtyń arqasynda búgingi nátıjege qol jetkizdik, – dedi Den Merklı.
Sońǵy jyldary elde tehnologııa men ınnovatsııany damytýǵa erekshe kóńil bólinip keledi. Bul halyqaralyq jarysty laıyqty deńgeıde ótkizýge berik negiz qalady.
– Elde qajetti tájirıbe de, ınfraqurylym da bar. Sońǵy jyldary tehnologııa men ınnovatsııaǵa da erekshe kóńil bólinip keledi. Sonyń arqasynda Games of the Future oıyndaryn ótkizýge jaqsy múmkindik qalyptasqan, – dedi ol.
Daıyndyqtaǵy erekshe sátter
Den Merklı daıyndyq kezinde este qalǵan birneshe oqıǵany atady. Sonyń biri ótken sáýirde Prezıdent Qasym-Jomart Toqaevtyń qatysýymen «Alem AI» halyqaralyq jasandy ıntellekt ortalyǵynyń resmı túrde jumys bastaýy aıryqsha mańyzdy oqıǵa boldy.
– Sol kúni bul oıyndardyń jaı ǵana sport jarysy emes ekenine taǵy bir márte kóz jetkizdik. Games of the Future Qazaqstannyń tehnologııany, jasandy ıntellektini jáne halyqaralyq yntymaqtastyqty damytýǵa basymdyq berip otyrǵanyn kórsetedi. Al maýsymda ótken Phygital Contenders Astana 2026 týrnıri biz úshin taǵy bir mańyzdy beles boldy. Sol jarysta sońǵy joldamalar sarapqa salynyp, Astananyń Games of the Future oıyndaryn qabyldaýǵa tolyq daıyn ekenine kóz jetkizdik, – dedi ol.
Sonymen qatar myńnan astam erikti birneshe aı boıy arnaıy daıyndyqtan ótken. Olar qonaqtardy qarsy alý, jarystardy uıymdastyrý jáne qyzmet kórsetý baǵyttary boıynsha tájirıbe jınady.
– Bul jastar úshin úlken tájirıbe mektebi. Olar halyqaralyq jarysty uıymdastyrýdyń qyr-syryn meńgerip qana qoımaı, Qazaqstanǵa kelgen qonaqtarǵa elimizdiń bet-beınesin tanystyryp júr. Sondyqtan eriktilerdi osy oıyndardyń eń úzdik elshileri dep aıtýǵa bolady, – dedi kompanııa basshysy.
Qazaqstan úshin qandaı múmkindik?
Den Merklıdiń aıtýynsha, Games of the Future oıyndarynyń Qazaqstanda alǵash ret ótýi el úshin mańyzdy oqıǵa.
– Ótken jylǵy oıyndardyń kórsetilimin álem boıynsha 461 mıllıonnan astam adam kórdi. Bul Qazaqstandy álemge tanytýǵa úlken múmkindik beredi. El óziniń sportty ǵana emes, tehnologııa men ınnovatsııany damytýǵa da erekshe mán beretinin kórsete alady, – dedi ol.
Onyń aıtýynsha, Astana uıymdastyrýshy qala retinde tek zamanaýı sport nysandary úshin tańdalǵan joq. Qazaqstannyń jańa tehnologııalardy damytýǵa degen ustanymy da mańyzdy ról atqardy.
Sonymen birge elde fıdjıtal sportyn damytý jumystary jalǵasyp jatyr. Qazaq Cybersport Federation jańa jarystar uıymdastyryp keledi. Al aldaǵy ýaqytta arnaıy fıdjıtal ortalyqtary ashylyp, jastarǵa jattyǵyp, jarysqa qatysýǵa múmkindik beriledi.
Uıymdastyrýdyń qıyn tusy nede?
Den Merklıdiń aıtýynsha, uıymdastyrýdyń eń kúrdeli mindet ártúrli elden keletin qatysýshylardyń jumysyn úılestirý bolǵan.
– Oıyndarǵa ondaǵan memleketten sportshylar keledi. Ár eldiń óz tártibi, óz ereksheligi bar. Sonymen qatar biz dástúrli sportty, kıbersportty jáne jańa tehnologııalardy bir jarysqa biriktirip otyrmyz. Munyń bárin bir júıege keltirý ońaı emes, – dedi ol.
Onyń pikirinshe, Games of the Future jarysynyń basty ereksheligi de osynda.
– Games of the Future oıyndarynyń basty ereksheligi de osynda. Bul jarys dástúrli jáne tsıfrlyq sportty ǵana emes, ortaq maqsat jolynda túrli elder men mádenıetterdi de toǵystyrady. Biz sporttyń erteńi qandaı bolatynyn búginnen kórsetip kelemiz, – dep túıindedi Den Merklı.
Aıta keteıik, fıdjıtal basketbol sportynda Qazaqstandyq GTB KZ komandasy jarysty aıaqtaǵan bolatyn.
Sonymen qatar Phygital basketboldyń erejesi jaıly jazǵan edik.
